Një reagim i ardhur papritmas nga presidenti amerikan Donald Trump, pritet që të sjellë sërish trazia në tregjet globale të hidrokarbureve. Mediat e huaja raportojnë se Trump refuzoi propozimin e fundit të Iranit për të rihapur Ngushticën e Hormuzit.
Ishte diplomati i lartë i Iranit, Abbas Araghchi, i cili njoftoi gjatë javës se Teherani i kishte paraqitur një ofertë të re Shteteve të Bashkuara për të shikuar rihapjen e rrugës ujore kritike dhe rifillimin e negociatave midis dy vendeve, në këmbim të përmbushjes nga SHBA-ja të disa kërkesave të hershme.
Të lidhura
None found
Mirëpo refuzimi i Trump ka shkaktuar një tjetër situatë të tensionuar. “Unë e hedh poshtë propozimin e tyre”, tha presidenti amerikan për mediat e huaja.
“Ata duan të bëjnë një marrëveshje ku ta hapin menjëherë ngushticën sepse po humbasin shumë. Ata duan të bëjnë një marrëveshje dhe mendoj se kjo është në rregull. Edhe mua më pëlqen të bëj një marrëveshje, por ajo marrëveshje nuk do të ishte e pranueshme.”, shtoi më tej Trump.
Refuzimi i Trump për të bërë marrëveshje për hapjen e Ngushticës së Hormuzit, mundet që të pasohet me çmime të larta të hidrokarbureve, sidomos naftës dhe benzinës, kostot e të cilave kanë qenë në “lëkundje” gjatë 2026.
