Dy burra janë ndaluar në Mançester nën dyshimin se po përgatitnin një sulm terrorist kundër komunitetit hebre në veri të Anglisë.
Të lidhura
None found
Arrestimet u kryen të dielën në qendër të Mançesterit, ndërsa të dyshuarit, të dy rreth të 30-ave, u shoqëruan nga autoritetet. Në kuadër të të njëjtit hetim, forcat e sigurisë kontrolluan edhe banesa në Salford dhe Liverpool.
Vicky Evans, koordinatore e lartë kombëtare e shërbimit britanik kundër terrorizmit, deklaroi se operacioni ishte rezultat i një hetimi të gjatë dhe me karakter parandalues.
Sipas hetuesve, nuk ka të dhëna për një rrezik të menjëhershëm ose të vazhdueshëm ndaj publikut. Pavarësisht kësaj, niveli i sigurisë në zonë është rritur.
Policia e Mançesterit të Madh ka intensifikuar kontrollet dhe patrullimet pranë sinagogave, si edhe në hapësira të tjera të frekuentuara nga komuniteti hebre, në prag të festave kryesore fetare.
Autoritetet britanike thonë se vigjilenca mbetet e lartë pas sulmit të vitit të kaluar ndaj një sinagoge në qytet, ku humbën jetën dy persona. Sipas tyre, autori ishte shtetas britanik me origjinë siriane dhe kishte deklaruar se vepronte në emër të Shtetit Islamik.
