Një paketë e re masash për sistemin arsimor italian pritet të shqyrtohet së shpejti nga Këshilli i Ministrave, njoftoi kryeministrja Giorgia Meloni.
Të lidhura
None found
Propozimet parashikojnë vendosjen e një kufiri ligjor për numrin e nxënësve të huaj në çdo klasë, mësimin e detyrueshëm të gjuhës italiane për prindërit e nxënësve të huaj me vështirësi serioze integrimi, si edhe ndalimin e burkave dhe hixhabeve në shkolla.
Meloni tha se masa e propozuar do të përfshijë të gjitha këto elemente, duke kërkuar gjithashtu që në ambientet shkollore fytyra e nxënëseve të jetë e zbuluar.
Sipas kryeministres, në Itali nuk mund të justifikohet fshehja e një vajze të re në emër të një tradite, pavarësisht nëse ajo konsiderohet e vërtetë apo e supozuar. Ajo theksoi se barazia gjinore nuk mund të negociohet, as në rrugë dhe as në shkolla.
Meloni argumentoi se masat synojnë të trajtojnë problemet e integrimit dhe të vendosin standarde të njëjta për të gjithë në sistemin arsimor.
Gjatë fjalës së saj, kryeministrja u ndal edhe te inteligjenca artificiale dhe ndikimi që ajo mund të ketë në fushatat e ardhshme zgjedhore.
“Algoritmet mund t’ju shpifin, por nuk mund t’ju mbishkruajnë”, deklaroi ajo, duke paralajmëruar se para zgjedhjeve mund të shtohet qarkullimi i materialeve të manipuluara dhe i përmbajtjeve të rreme.
Ajo u kërkoi qytetarëve të mos i konsiderojnë automatikisht të besueshme të gjitha informacionet që do të shfaqen gjatë muajve të ardhshëm.
Kryeministrja mohoi ndërkohë pretendimet se qeveria kishte penguar një nismë dypartiake për vendosjen e një moratoriumi mbi përdorimin e rrjeteve sociale nga të miturit.
Meloni tha se nuk ishte e vërtetë ajo që, sipas saj, pretendonin disa përfaqësues të krahut të majtë. Ajo sqaroi se qeveria kishte shmangur ndërhyrjen në iniciativat qeveritare, pikërisht sepse Parlamenti po e trajtonte këtë çështje.
Sipas saj, mbrojtja e të miturve nuk mund të jetë përgjegjësi vetëm e familjeve. Ajo kërkoi që platformat të mbajnë pjesën kryesore të barrës, pasi kanë mundësinë të heqin shumë prej mekanizmave që krijojnë varësi te të rinjtë.
Meloni ngriti edhe problemin e verifikimit të moshës së përdoruesve të rrjeteve sociale. Ajo kërkoi një mënyrë që të mos i detyrojë qytetarët të paraqesin dokument identifikimi, pasi një procedurë e tillë mund të sillte “profilizimin më të gjerë të qytetarëve të imagjinuar ndonjëherë”.
