Vetëm pak orë kanë mbetur deri te një prej vendimeve më të rëndësishme dhe më të ndjeshme gjyqësore për Kosovën në periudhën e pasluftës.
Të lidhura
None found
Të mërkurën, më 16 shtator, duke nisur nga ora 10:00, Dhomat e Specializuara të Kosovës në Hagë do të shpallin aktgjykimin e shkallës së parë ndaj Hashim Thaçit, Kadri Veselit, Rexhep Selimit dhe Jakup Krasniqit.
Seanca do të zhvillohet në publik dhe do të ndiqet drejtpërdrejt përmes faqes zyrtare të Dhomave të Specializuara, në gjuhët shqipe, angleze dhe serbe. Sipas njoftimeve të bëra para seancës, shpallja e aktgjykimit pritet të zgjasë rreth dy orë, deri afërsisht në mesditë.
Kjo kohëzgjatje nuk nënkupton se gjykata do të lexojë të gjithë dokumentin e aktgjykimit. Në raste të tilla, kryetari i Trupit Gjykues zakonisht përmbledh konstatimet kryesore dhe më pas njofton vendimin për çdo pikë të aktakuzës dhe për secilin të akuzuar.
Vendimi i së mërkurës do të jetë i shkallës së parë dhe, cilido qoftë përfundimi, palët do të mund të paraqesin ankesë.
Mbështetësit mblidhen në Hagë
Gjatë së martës, në Hagë kanë mbërritur qytetarë nga Kosova dhe nga vende të ndryshme evropiane. Në pamjet e publikuara nga zona pranë gjykatës janë parë flamuj shqiptarë, flamuj të Kosovës dhe simbole të UÇK-së.
Disa pjesëmarrës kanë deklaruar se do ta presin vendimin gjatë natës pranë ndërtesës së Gjykatës, edhe në qiell të hapur. Organizatat e dala nga lufta kanë njoftuar se në Hagë pritet të mblidhen qytetarë nga Kosova dhe diaspora.
Forcat e policisë holandeze kanë shtuar masat e sigurisë në rrethinë dhe u kanë bërë thirrje të pranishmëve të qëndrojnë në hapësirat e përcaktuara. Deri në mbrëmje, nuk janë shënuar incidente serioze.
Prishtina e pret vendimin me “Natën e Pritjes”
Edhe në Prishtinë janë zhvilluar përgatitje për ndjekjen e aktgjykimit. Në kryeqytet është ndezur “Flaka e Lirisë”, ndërsa qytetarë janë mbledhur para ekranit të madh ku janë vendosur portretet e Thaçit, Veselit, Selimit dhe Krasniqit.
Pjesëmarrësit kanë thënë se synojnë të qëndrojnë në shesh përgjatë gjithë natës. Nga i njëjti vend pritet të ndiqet bashkërisht transmetimi i seancës nga Haga.
Veprimtari në mbështetje të ish-krerëve të UÇK-së janë zhvilluar ose janë lajmëruar edhe në Skenderaj, Mitrovicë dhe qytete të tjera. Në Shkup është mbajtur një marsh, ndërsa mbështetje kanë shprehur edhe përfaqësues politikë në Shqipëri dhe organizata të diasporës.
Në Hagë shkojnë familjarë dhe figura politike
Mes personave që kanë udhëtuar drejt Hagës janë edhe familjarë të të akuzuarve. Ish-deputeti Abelard Tahiri publikoi pamje nga udhëtimi i tij së bashku me Endrit Thaçin, djalin e Hashim Thaçit.
Vlora Çitaku, Sekretare e Përgjithshme e PDK-së, njoftoi nga Haga se ndodhet atje për të pritur vendimin. Është bërë e ditur gjithashtu se pritet të jetë i pranishëm Glauk Konjufca. Në drejtim të Hagës kanë marrë rrugë edhe përfaqësues të organizatave të luftës, ish-luftëtarë, aktivistë dhe pjesëtarë të diasporës.
Gjykata nuk ka publikuar listën përfundimtare të familjarëve dhe personaliteteve që do të lejohen në sallë. Vendet në galerinë e saj janë të kufizuara, ndërsa hyrja mundësohet vetëm për personat e regjistruar paraprakisht dhe të pajisur me konfirmim zyrtar.
Akuzat që shqyrtohen nga Gjykata
Hashim Thaçi, Kadri Veseli, Rexhep Selimi dhe Jakup Krasniqi akuzohen për gjashtë vepra të krimeve kundër njerëzimit dhe katër vepra të krimeve të luftës. Në aktakuzë përfshihen, ndër të tjera, përndjekja, burgosja, tortura, vrasja e paligjshme dhe zhdukja me forcë.
Prokuroria pretendon se këto vepra janë kryer në disa lokacione në Kosovë dhe në veri të Shqipërisë, në periudhën nga marsi i vitit 1998 deri në shtator të vitit 1999.
Të gjithë të akuzuarit i kanë hedhur poshtë pretendimet e Prokurorisë dhe janë deklaruar të pafajshëm.
Procesi gjyqësor nisi më 3 prill 2023. Në gjykim dëshmuan 134 persona, prej të cilëve 125 u thirrën nga Prokuroria, dy nga mbrojtësi i viktimave dhe shtatë nga ekipet mbrojtëse. Në procedurë u përfshinë 156 viktima të pranuara nga Gjykata. Provat përfunduan së paraqituri në dhjetor të vitit 2025, ndërsa deklaratat përmbyllëse u dhanë në shkurt të vitit 2026.
Pritja për orën vendimtare
Familjarët dhe mbështetësit shpresojnë që vendimi të jetë lirues, por përfundimi i çështjes do të bëhet i ditur vetëm kur Trupi Gjykues ta shpallë zyrtarisht aktgjykimin.
Ndërkohë, orët para seancës po shoqërohen me pritje, pasiguri dhe mobilizim qytetar. Në Hagë, Prishtinë, trojet shqiptare dhe në diasporë, vëmendja është përqendruar te ora 10:00 e 16 shtatorit.
