Policia greke ka arrestuar në Athinë dy shtetas grekë, të cilët u kapën në flagrancë pranë një motori të parkuar në afërsi të një biznesi në qendër të kryeqytetit, nën dyshimin se po përpiqeshin ta vidhnin.
Të lidhura
None found
Rasti u zbulua gjatë patrullimit të efektivëve në atë zonë. Dy personat u vunë re pranë motorit dhe u ndaluan nga policia përpara se të largoheshin me të.
Të dyshuarit fillimisht e mohuan përfshirjen në ndonjë tentativë vjedhjeje. Por kontrolli i numrit të shasisë zbuloi se motori ishte bërë objekt i një tentative për t’u vjedhur.
Autoritetet më pas njoftuan pronarin e mjetit, i cili rezultoi një shtetas shqiptar. Ai u shpjegoi policëve se e kishte parkuar motorin jashtë biznesit ku punonte, pasi ai kishte pësuar një defekt.
Dy të arrestuarit, sipas informacioneve të publikuara, kanë qenë edhe më herët në ndalim nga autoritetet greke për vepra të ngjashme.
Pas ndalimit, ata u paraqitën para gjykatës, e cila vendosi t’i lërë në burg për 30 ditë.
