Gazetari Artan Hoxha ka akuzuar ish-zëvendëskryeministren dhe ish-ministren e Energjisë, Belinda Balluku, se ka ndërhyrë drejtpërdrejt ndaj kompanisë “Delvina Gas”. Sipas tij, çështja bëhet edhe më serioze pasi Balluku nuk ua la veprimet institucioneve përkatëse, por shkoi vetë në ambientet e kompanisë.
“Ka qenë Belinda Balluku me dorën e vet, me drejtorin e policisë së qarkut, me drejtorin e policisë kriminale, me shefin e komisariatit, me shefin e IKMT-së”, deklaroi Hoxha.
Të lidhura
None found
Ai tha se ndërhyrja u krye në kohën kur “Delvina Gas” ishte pranë fillimit të aktivitetit, pasi kishte investuar ndjeshëm në infrastrukturën për përpunimin dhe shfrytëzimin e gazit. Më vonë, sipas gazetarit, u kuptua arsyeja e veprimit: kompaninë e kërkonte Ron Yeffet dhe njerëzit e lidhur me Ballukun.
Hoxha argumentoi se fusha gazmbajtëse e Delvinës përbën një aset kombëtar dhe lidhet me sigurinë kombëtare. Ai theksoi se biznesi dhe rafineria e ngritur në atë zonë u bllokuan nga Ministria e Energjisë, ndërsa Kryeministri i Shqipërisë kishte firmosur një kontratë që e detyron vendin të importojë 6 miliardë dollarë gaz të lëngshëm. Sipas tij, gazi do të sillte në Vlorë një kompani greke nga Shtetet e Bashkuara të Amerikës, ndërsa problemi mbetet se Shqipëria nuk ka instalime për përdorimin e gazit.
Sipas rrëfimit të tij, pasi aksioneri shqiptar mori 90% të kompanisë, investoi në projekt dhe ndërtoi rafineritë, objekti ishte bërë gati për të nisur shfrytëzimin. Në këto rafineri përdoren procese për filtrimin, ambalazhimin dhe transportimin e gazit. Më 29 korrik, në media u publikua lajmi se Policia, Ministria e Energjetikës, Inspektorati Kombëtar i Mbrojtjes së Territorit dhe Inspektorati i Mjedisit, në bashkëpunim me Drejtorinë e Policisë së Vlorës, Komisariatin e Sarandës dhe Komisariatin e Delvinës, kishin zbuluar një TEC pa leje.
Hoxha tha se bëhej fjalë për një TEC me vlerë 100 milionë dollarë, i cili u paraqit në media si një objekt i ndërtuar pa leje. Biznesmeni u shpall në kërkim, ndërsa administratori dhe dy inxhinierë amerikanë të kompanisë u arrestuan. Kompania, sipas tij, është e regjistruar në Ishujt e Virgjër.
Gazetari deklaroi se në hyrje të “Delvina Gas” kishte shkuar vetë Belinda Balluku, së bashku me drejtorin e policisë së qarkut, drejtorin e policisë kriminale, shefin e komisariatit, shefin e IKMT-së dhe Dallëndyshe Bicin. Ai shtoi se nuk ishte i sigurt nëse në atë aksion kishte marrë pjesë edhe ministrja Kumbaro, pasi kjo duhej verifikuar. Sipas tij, në kompani shkuan të gjitha inspektoratet e mundshme dhe rafinerisë iu vendos shiriti bllokues.
Hoxha tha se autoritetet e paraqitën ngjarjen si zbulimin e një rafinerie pa leje në ndërtim dhe shpallën në kërkim aksionerin kryesor. Ai pretendoi se qëllimi nuk ishte marrja e ryshfetit për investimin, por marrja e vetë objektit, duke ushtruar presion që aksioneri të dorëzohej dhe të largohej.
Paralelisht me bllokimin e rafinerisë, sipas Hoxhës, SPAK nisi një hetim ndaj biznesmenit dhe e përfshiu atë në çështjen e inceneratorit të Fierit, bashkë me Arben Ahmetajn. Gazetari tha se biznesmeni u akuzua se kishte ndihmuar Ahmetajn dhe se ndaj tij u ngrit akuza për pastrim parash. Në një njoftim zyrtar të 18 marsit të këtij viti, SPAK njoftoi se çështja e Arben Ahmetajt dërgohej për gjykim dhe se pronari i “Delvina Gas” merrej i pandehur.
Pas këtij zhvillimi, më 26 mars, në hyrje të “Delvina Gas” u shfaqën ambasadorja amerikane në Shqipëri, e ngarkuara me punë dhe ambasadori holandez. Sipas Hoxhës, ata shkuan në mbështetje të kompanisë dhe për të dhënë mesazhin që procedurat të mos vijonin më tej. Ai tha se aksioneri ndërmori edhe hapa të tjerë, duke përfshirë një kompani holandeze dhe dy shtetas amerikanë, me synimin që prona të mos i merrej.
Hoxha deklaroi gjithashtu se veprimet që kërkonte të kryente Ron Yeffet ishin realizuar përmes Belinda Ballukut. Sipas tij, më 29 korrik të vitit të kaluar, Balluku kishte dhënë një intervistë në hyrje të rafinerisë. Intervista nuk është publikuar, ndonëse grupi i xhirimit kishte qenë në vendngjarje, ndërsa momenti ishte regjistruar edhe nga kamerat e objektit.
Ai tregoi se aksioneri ishte pyetur nëse i ishin kërkuar para apo nëse kishte ofruar para, por përgjigjja e tij kishte qenë se nuk bëhej fjalë për para, pasi synimi ishte objekti. Sipas Hoxhës, aksioneri kishte shkuar deri te Kryeministri, i cili i kishte thënë se nuk ndërhynte në këtë çështje dhe se nuk mund të ndërhynte te Balluku.
Gazetari tha se gjatë hetimit të historisë u ngrit edhe çështja e “ukrainasve”, për të cilët më pas doli se ishin të lidhur me Ron Yeffet. Ai shtoi se fusha gazmbajtëse e Delvinës parashikohet të ketë mbi 2.5 miliardë dollarë rezerva gazi nëntokësore dhe se bëhet fjalë për gaz shumë cilësor, me fuqi jashtëzakonisht të lartë. Sipas Hoxhës, pikërisht kjo e bën zonën tërheqëse dhe fitimprurëse, ndërsa përpjekja për t’ia marrë pronën po bëhet përmes fuqisë së pushtetit dhe nxjerrjes së aksionerit në pozita të pambrojtura.
