Donald Trump ka reaguar ashpër ndaj deklaratave të Dario Amodeit, CEO-s së Anthropic, i cili kishte folur për mundësinë e një ritmi më të ngadaltë në zhvillimin e modeleve të Inteligjencës Artificiale.
Të lidhura
None found
Në një mesazh të publikuar në Truth Social, presidenti amerikan tha se IA-ja nuk ka nevojë për masa të tjera kontrolli. Sipas tij, ajo ka nevojë për një president “të fortë dhe të mençur”, rol që, siç theksoi Trump, e ushtron aktualisht Shtetet e Bashkuara.
“E vetmja mbrojtje që i duhet IA-së është një president i fortë dhe i mençur, me IQ të lartë dhe SHBA-të e kanë atë, dhe me bollëk”, shkroi ai.
Trump deklaroi se administrata e tij ka marrë masa për të penguar drejtuesit e kompanive të Inteligjencës Artificiale që të ndërmarrin veprime të cilat ai i vlerëson si të këqija ose të rrezikshme. Duke folur për Amodein, presidenti amerikan e akuzoi atë se po përpiqet të shfaqet si një “engjëll i vogël perfekt”.
Ai shtoi se administrata amerikane zotëron “pushtet të jashtëzakonshëm” ndaj kompanive të IA-së, përmes procedurave penale dhe rregullave ligjore.
Në të njëjtin postim, Trump denoncoi atë që e quajti një “konspiracion të sëmurë” kundër Inteligjencës Artificiale dhe qendrave të të dhënave. Sipas presidentit, përfituesja e vetme e një zhvillimi të tillë do të ishte Kina.
“Kushdo që fiton Inteligjencën Artificiale, fiton”, deklaroi Trump, duke pretenduar se SHBA-ja ndodhet aktualisht përpara Kinës dhe të gjitha vendeve të tjera në këtë garë teknologjike.
“Ne jemi përpara Kinës dhe të gjithëve të tjerëve, dhe do të vazhdojmë ta bëjmë këtë”, u shpreh ai.
Mesazhin e tij, Trump e mbylli me një paralajmërim të drejtpërdrejtë për teoricienët e konspiracioneve, tradhtarët, dezertorët dhe personat që nxjerrin informacione. “Kujdes”, shkroi presidenti amerikan.
Reagimi i Trump vjen në një periudhë kur përplasja mes Shteteve të Bashkuara dhe Kinës për epërsinë në zhvillimin e Inteligjencës Artificiale është shndërruar në një nga prioritetet kryesore strategjike dhe teknologjike të administratës amerikane.
