Unioni Demokristian (CDU) ka dalë partia më e votuar në zgjedhjet komunale të Saksonisë së Poshtme, duke ruajtur epërsinë ndaj Partisë Socialdemokrate (SPD). Ky rezultat i jep një lehtësim të pjesshëm kancelarit Friedrich Merz, ndonëse Alternativa për Gjermaninë (AfD) ka shënuar rritje të konsiderueshme dhe është renditur e treta.
Të lidhura
None found
Të dhënat paraprake të autoriteteve zgjedhore tregojnë se CDU-ja ka grumbulluar 27,2 për qind të votave për këshillat e qarqeve.
SPD-ja ka marrë 24,6 për qind, ndërsa AfD-ja është votuar nga 15,9 për qind e zgjedhësve.
Sipas mediave vendase, ky është praktikisht rezultati më i lartë i AfD-së në historinë e pjesëmarrjes së saj në zgjedhjet komunale në Saksoninë e Poshtme.
Pjesëmarrja ka qenë 64,6 për qind, një nivel dukshëm më i lartë krahasuar me zgjedhjet e vitit 2021, kur në votime morën pjesë 57,0 për qind e zgjedhësve.
Rreth 6,3 milionë qytetarë kishin të drejtë vote në këto zgjedhje. Rezultati u publikua në një periudhë delikate për politikën gjermane, pas humbjes së CDU-së në zgjedhjet e landit Saksoni-Anhalt dhe diskutimeve që kanë shoqëruar kancelarin Merz.
Sebastian Lechner, kryetar i CDU-së në Saksoninë e Poshtme, kishte shfaqur besim edhe përpara njoftimit të rezultateve të para, por pranoi se gara u zhvillua në një atmosferë të vështirë politike.
“Edhe ne e kemi vënë re pakënaqësinë ndaj Berlinit”, deklaroi ai.
