Donald Trump zhvilloi një bisedë telefonike prej rreth një ore me presidentin rus Vladimir Putin. Sipas raportimeve të mediave të huaja, nga Moska ai mori garancinë se Rusia nuk ka “plane agresive” ndaj Evropës.
Të lidhura
None found
Informacioni u bë publik nga këshilltari i Putinit për politikën e jashtme, Juri Ushakov, i cili foli para gazetarëve. Deklarata vjen disa javë pas sulmit hibrid ndaj aeroportit Leipzig-Halle, për të cilin qeveria gjermane ka fajësuar Rusinë.
Ushakov e përshkroi komunikimin mes dy presidentëve si “konstruktiv dhe mjaft të sinqertë”. Ai tha se Putin i paraqiti Trumpit një “analizë objektive dhe të detajuar të zhvillimeve në fushën e betejës”, si dhe i shpjegoi “çfarë mund të bëjnë amerikanët për t’u dhënë fund sa më shpejt luftimeve”. Këshilltari rus nuk dha detaje të tjera mbi këtë pjesë të bisedës.
Telefonata u zhvillua në një periudhë kur shtetet perëndimore po rrisin ndihmën ushtarake për Ukrainën, ndërsa Moska po lë të kuptohet se mund të ketë një afrim të ri me Uashingtonin. Kremlini ka shprehur vlerësim për vizitën në Rusi të të dërguarve amerikanë Steve Witkoff dhe Jared Kushner gjatë fundjavës. Sipas tij, gjatë bisedës u trajtua edhe mundësia e organizimit të shkëmbimeve të tjera të të burgosurve.
Edhe presidenti ukrainas Volodymyr Zelenski vlerësoi të dërguarit amerikanë, duke deklaruar se ata paraqitën disa ide “shumë të mira dhe me vlerë” për përfundimin e luftës. Zelensky tha gjithashtu se shpreson të takohet me Trumpin brenda dy javëve të ardhshme.
Ndërkohë, zëdhënësi i Kremlinit, Dmitry Peskov, deklaroi se Rusia vijon të jetë e përkushtuar për realizimin e objektivave të saj ushtarake dhe beson se ndodhet pranë fitores. Trump ende nuk ka bërë një deklaratë publike lidhur me bisedën me Putinin.
