Alternativa për Gjermaninë (AfD), parti e ekstremit të djathtë, pritet të renditet e para në zgjedhjet shtetërore të Saksoni-Anhaltit, pasi sondazhet e fundit i atribuojnë rreth 41% të votave.
Të lidhura
None found
Një rezultat i tillë do të mund të ndikonte ndjeshëm në skenën politike të Gjermanisë dhe të shtonte trysninë mbi kancelarin Friedrich Merz.
Në këtë land të Gjermanisë lindore, rreth 1.7 milionë persona janë të regjistruar për të votuar. Procesi zgjedhor nisi në orën 08:00 dhe përfundon në orën 18:00, ndërsa rezultatet e para të sondazheve pas mbylljes së qendrave pritet të japin një ide fillestare për përfundimin e garës.
Një shumicë absolute do t’i hapte AfD-së rrugën për të krijuar për herë të parë një qeveri në nivel landi. Ky do të ishte një moment i paprecedentë si për partinë, ashtu edhe për politikën gjermane të pas Luftës së Dytë Botërore.
Sipas matjes së fundit të transmetuesit publik ZDF, AfD mbështetej nga 41% e të anketuarve, ndërsa CDU-ja e drejtuar nga kancelari Friedrich Merz renditej me 23%.
Die Linke kishte 11.5%, Social Demokratët 8.5% dhe të Gjelbrit 6%. Ndërkohë, dy forca të tjera politike nuk e kalonin kufirin prej 5%, i cili nevojitet për të hyrë në parlamentin e landit.
Mbështetja për AfD-në është rritur mes pakënaqësive lidhur me gjendjen ekonomike, emigracionin dhe politikat e qeverisë federale. Megjithatë, një fitore e madhe nuk do të garantonte automatikisht krijimin e qeverisë, pasi partitë kryesore gjermane kanë përjashtuar në mënyrë të prerë çdo bashkëpunim me të.
CDU-ja dhe forcat e tjera tradicionale vazhdojnë të mbajnë në fuqi të ashtuquajturën “Brandmauer”, ose “mur mbrojtës”, që nënkupton refuzimin e koalicioneve me AfD-në.
Dega e AfD-së në Saksoni-Anhalt është shpallur “ekstremiste e krahut të djathtë” nga autoriteti gjerman përgjegjës për inteligjencën e brendshme.
CDU-ja, e cila aktualisht drejton landin, synon të krijojë një aleancë me disa parti të tjera për të qëndruar në pushtet, edhe pse sondazhet tregojnë një diferencë të konsiderueshme në favor të AfD-së.
Ulrich Siegmund, 35 vjeç, është kandidati kryesor i AfD-së. Ai është shndërruar në një nga figurat më të njohura të partisë edhe falë aktivitetit në rrjetet sociale, veçanërisht në TikTok.
Siegmund ka thënë se do të marrë drejtimin e landit vetëm nëse partia fiton shumicën absolute, ndërsa ka mohuar mundësinë e një koalicioni me forcat e tjera politike.
Para se të hynte për të votuar, ai u shpreh optimist për rezultatin dhe deklaroi se shpresonte që AfD të arrinte rreth 45% të votave.
Platforma e tij parashikon një qasje më të ashpër ndaj emigracionit, duke përfshirë një ofensivë për “rimigrim” dhe dëbime. Ai ka premtuar gjithashtu ndalimin e flamujve të ylberit në shkolla, frenimin e ndërtimit të parqeve të reja me erë dhe ndryshime simbolike në identitetin e landit.
Gara elektorale në Saksoni-Anhalt konsiderohet një provë e rëndësishme për kancelarin Friedrich Merz dhe kabinetin e tij.
Merz është kritikuar për performancën e ekonomisë gjermane dhe për faktin se nuk ka arritur ta zvogëlojë ndjeshëm mbështetjen për AfD-në.
Një rezultat shumë i fortë i së djathtës ekstreme do ta rëndonte edhe më tej pozitën e kancelarit, sidomos pasi AfD ka dalë përpara CDU-së edhe në disa sondazhe në nivel kombëtar dhe synon një rezultat të fuqishëm në zgjedhjet federale të vitit 2029.
