42-vjeçari turk, Harun Çelik është dëbuar me urgjencë nga Shqipëria mbrëmjen e sotme. Abc News ka arritur të mësojë përmes burimeve të besuara, se 42-vjeçari është ndaluar në aeroportin e Rinasit, 5 muaj më parë teksa hynte tranzit me pasaportë kanadeze false. Ai kishte arritur ti shëptonte përndjekjes së regjimit turk, por u arrestua në Shqipëri për “dokumente false”.
Harun Çelik vuajti dënimin prej 5 muaj e gjysmë në burgun 302 tek rruga “Mine Peza” në Tiranë. Sot (1 janar 2020) ai është njoftuar se i ka përfunduar dënimi. Por as sot, 42 vjeçari nuk është lënë i lirë.
Menjëherë është transportuar nga qelia e burgut, në Drejtorinë e Migracionit që ndodhet në Laprakë. Pasi është mbajtur disa orë aty në mënyrë të paligjshme, Harun Celik është shoqëruar me makina policie në aeroportin e Rinasit, siç shihet në pamjet e siguruara nga Abc News.
Miqtë e tij kanë reaguar në rrjetet sociale duke e cilësuar të padrejtë vendimin e autoriteteve shqiptare për të dëbuar mësuesin turk. Ata apelojnë për lirimin e 42-vjeçarit që përndiqet në Turqi, vetem se është mbështetës i Lëvizjes Gylen.
“Harun Çelik u dërgua në zyrën e Migracionit dhe prej andej u rrëmbye dhe u fut me forcë në një automjet. Miqtë e tij ndërhynë në aeroport. A ka ndonjë ligj në Shqipëri?”, shkruan Barbarossa Kaya, e cila bën tag në twitter Kryeministrin Rama.
Harun Çelik, 42 vjeç, është mësues me profesion dhe i shpëtoi përndjekjes në Turqi, pasi vuajti dënimin në Shqipëri po dërgohet jashtë vullnetit të tij sërish në Turqi. Kërkesa e tij për azil nuk është marrë parasysh! Dëbimi i gylenistit nga Shqipëria është kryer me shpejtësi dhe në fshehtësi.
