Napoli përmbys Brescian dhe ngjitet në zonën Europiane (VIDEO)

Napoli arrin të përmbysë rezultatin në pjesën e dytë përballë Brescias në transfertë, ku fitoi 1-2, dhe ngjitet në zonën europiane të Serisë A (36 pikë), por sigurisht renditja pas javës së 25-të do të varet edhe nga rezultatet e skuadrave rivale si Verona, Parma e Milan, që kanë nga 35 pikë.

Për skuadrën e Gattusos ishte suksesi i dytë radhazi jashtë fushe, çka rrit optimizmin për një seri të gjatë fitoresh në këtë etapë të rëndësishme të edicionit.

Triumfi në “Rigamonti” nuk erdhi pa djersitur shumë, madje pjesa e parë u mbyll me epërsinë minimale të vendasve me gol të Chanchellor.

Napolitanët reaguan në mënyrën e duhur brenda 5 minutave në fraksionin e dytë me Lorenzo Insignen që realizoi nga pika e bardhë e penalltisë (50’) dhe Fabian Ruiz (54’), i shërbyer nga Di Loenzo.

Në minutën e 85-të, trajneri Lopez i rezervoi disa minuta në fushë Emanuele Ndojit, por prania e shqiptarit nuk ndikoi aq sa për të sjellë ndryshim tjetër rezultati.


Shtuar 21.02.2020 21:54