Princesha Anne është plagosur dhe është dërguar me urgjencë në spital, ku po trajtohet për tronditje dhe lëndime të lehta në kokë. Mediat e huaja raportojnë se motra e Mbretit Charles, ishte duke shëtitur me kalë në pronën e saj në Gatcombe Park në Gloucestershire kur u lëndua.
Shkaku i dëmtimit të saj në kokë është ende i pakonfirmuar. Princeshës iu dha ndihma e parë, përpara se të dërgohej në Spitalin Southmead në Bristol për analiza, trajtim dhe vëzhgim.
Bashkëshorti i Anne, zëvendësadmirali Sir Tim Laurence dhe fëmijët e saj, Zara Tindall e Peter Phillips, ishin të gjithë në pronë në kohën kur ajo u plagos. Shërbimet e urgjencës mbërritën në vendngjarje. Vëllai i saj Mbreti Charles është informuar për incidentin dhe së bashku me të gjithë familjen mbretërore i dërgojnë urimet e tyre princeshës për një shërim të shpejtë.
Princesha Anne, së fundmi, ka qenë shumë e angazhuar në detyra duke qenë se Mbreti Charles për shkak të gjendjes shëndetësore ka anuluar pjesëmarrjen në evente të ndryshme.
