Munguan te super festa e Olsa Muhametit, Melisa dhe Andi: Nuk lëpijmë aty ku pështyjmë (VIDEO)

Andi Shehi dhe Melisa Lleshi u bënë për javë me radhë kryefjala e mediave rozë me aludimet se ata ishin çift, derisa më në fund e konfirmuan në videoklipin e kësaj të fundit, “Leje”. Tanimë, dyshja është e hapur për lidhjen e tyre e madje herë pas here postojnë edhe foto e momente me njëri-tjetrin në Instagram. Sëfundmi, Andi dhe Melisa dhanë një intervistë çift për “Prive”, ku treguan më shumë për romancën e tyre, por jo vetëm.

Ata u ndalën edhe te rrugëtimi i tyre televiziv në programin e dashurisë ku zbuluan edhe pse nuk morën pjesë në javën e fundit të “Për’puthen” reunion, si dhe në festën e organizuar me të gjithë ish-konkurrentët.

“Për mendimin tim, “Për’puthen” e kanë bërë njerëzit, që do të thotë se për çdo vendim apo për çdo gjë që është bërë aty brenda, kanë qenë njerëzit në mënyrë indirekte që vendosnin çfarë duhej bërë dhe për këtë arsye kanë ndodhur shumë gjëra që kanë dalë të paparashikuara dhe gjëra që nuk duheshin bërë, siç ishte dalja ime me një person tjetër. Unë, kurrsesi nuk kam pasur asgjë me atë person, asnjë puthje në faqe nuk e kemi shkëmbyer sepse ka qenë loja e atillë, të dalim,” është shprehur Andi.

Ndërkohë Melisa ka theksuar se “nuk lëpin dot aty ku ka pështyrë”.

“Për pjesën e reunion, në fakt jo vetë autorja, por dikush tjetër që ishte I brendshëm I emisionit na ka ftuar tek java e fundit e programit, por ne kemi refuzuar dhe domosdoshmërisht as te festa nuk mund të ishim. Unë të paktën nuk lëpij dot aty ku kam pështyrë. Eksperiencë e bukur, me gjithë ato kleçkat e veta, por gjithsesi…” tha ajo.

Andi më pas i ka mbështetur mendimin: “Ka gjetur tenxherja-kapakun. Është nje eksperiencë shumë e bukur që çdo njeri ka të drejtën ta provojë e të gjitha dhe nuk kemi asgjë kundra dhe me pjesën e “Top Channel” sepse normalisht është perandori…”

Ish-konkurrentja më pas ka shtuar se është thjesht “një person” duke lënë të kuptohej se e kishte për autoren e emisionit, Olsa Muhameti.

Shtuar 5.06.2021 12:35