“Tymi i zi” , i zi sterr në fakt nga mbledhja e këshillit bashkiak të Shkodrës. 33 vota kundër aprovimit të fondit prej rreth 820 milionë lekëve të vjetra që do të mjaftonin për të mbuluar 20% të borxhit që klubi Vllaznia ka ndaj tatimeve. Ky do të ishte kësti i parë që klubi kuqeblu do t’i paguante drejtorisë së përgjtihshme të tatimeve dhe mbi të gjithë do të merrte një dritë jeshile për pjesmarrjen në Europë, gjithmonë nëse ja del sportivisht.
Kërkesa e kryetares së bashkisë Ademi nuk u morr në konsideratë nga këshilli bashkiak, dhe edhe pse sponspor Alban Xhaferri me dashamirësinë dhe dëshirën për ta riparë skuadrën në Europë po mundohet të vendosë vetë pikat mbi i, janë shumë pika për t’u mbuluar nga një person i vetëm.
Vllaznia po bën një sezon shumë pozitiv dhe pavarësisht krizës së përjetuar në 8-9 javët e fundit, skuadra është në vend të parë dhe në gjysmëfinalet e Kupës së Shqipërisë, por për momentin nëse nuk ndryshon asgjë në Europë nuk do të shkojë ekipi i Brdaric, as nëse fiton kampionatin e as nëse fiton Kupën, dmth të fitojë c’të dojë sepse nuk do të luajë në kualifikueset e Championsit apo Europa Leagues. FSHF ka vendosur si afat të fundit datën 31 Mars, vështirë duket që të zgjidhet diçka.
Tifozët në rrjetet sociale kanë ndërmarrë prej kohësh një fushatë për të bindur personat kompetentë të ndihmojnë klubin, por deri më tani askush nuk i ka dëgjuar. Nuk diskutohet që 820 milionë lekë për një bashki janë shumë, por ky borxh i akumuluar është edhe përgjegjësi e bashkisë që ka shumicën e aksioneve të klubit dhe nëse Vllaznia nuk luan në Europë atëherë shumë shkodranë që kanë patur dhe kanë në dorë të ngrejnë e ulin kartonin në këshillin bashkiak duke përfshirë edhe kryetaren duhet t’u “vijë marrë”.
