Policia italiane ka vënë në pranga një shqiptar në Itali pasi ka kërcënuar nëpërmjet një videoje intime një grua po shqiptare, me të cilën kishte lidhje intime.
Shqiptari, 40-vjeçar kërcënoi 50-vjeçaren duke i kërkuar asaj shumën prej 5 mijë eurosh ose do të publikonte pamjet e aktit mes tyre.
“Milanotoday.it” shkruan se 40-vjeçari dhe gruaja 10 vite më e madhe se ai, e cila kishte humbur bashkëshortin, janë njohur rastësisht.
Shqiptari dhe gruaja e ve kishin nisur të frekuentoheshin bashkë dhe në një nga takimet e tyre, 40-vjeçari e kishte filmuar 50-vjeçaren gjatë seksit oral, shkruajnë mediat italiane.
Këtë video, ai e ka përdorur menjëherë, kur në fund të takimit, i ka bërë të qartë shqiptares se në telefonin e tij ndodhet video intime dhe ajo do të shpërndahej në internet nëse ajo nuk i jepte 5 mijë euro.
Sipas mediave italiane, shqiptari i cili ishte i martuar, është denoncuar në Polici nga 50-vjeçarja, e cila me lot në sy, siç përshkruajnë mediat italiane, ka rrëfyer situatën ku ndodhej për shkak të njohjes me bashkëatdhetarin.
Kështu, efektivët i kanë ngritur një kurth 40-vjeçarit. Policia organizoi një takim mes tij dhe gruas të cilën e pajisën me regjistrues, i dhanë një pjesë të parave që kërkonte, të shënuara më parë, që të njiheshin nga policia dhe rrethuan zonën ku “çifti” do bënte takimin.
Duke parë shumën e vogël të parave që ajo kishte bërë gati, 40-vjeçari e kërcënoi përsëri shqiptaren duke i kërkuar më shumë para.
Çdo bisedë mes tyre u dëgjua nga policia dhe në atë moment u ndërhy për ta bllokuar shqiptarin i cili mbante në dorë paratë e shënuara nga policia.
Në celularin e tij u gjet videoja intime, e cila, nga hetimet paraprake, nuk rezulton të jetë zbuluar përmes rrjeteve sociale apo përmes mesazheve.
40-vjeçari përfundoi pa telefon dhe me pranga në duar në Burgun e Busto Arsizio (Varese).