Teksa situata pranë Kryeministrisë, në Bulevardin “Dëshmorët e Kombit”, mbetet e përshkallëzuar, Ervin Salianji ka reaguar përmes rrjeteve sociale, duke kërkuar largimin e kryeministrit Edi Rama. Sipas tij, nëse Rama nuk jep dorëheqjen, qytetarët do ta largojnë.
Në reagimin e tij, Salianji ka drejtuar kritika edhe ndaj opozitës, për të cilën thotë se po qëndron e tërhequr, në heshtje dhe e frikësuar, njësoj si pushteti që deklaron se kundërshton. Këtë sjellje ai e vendos në sfondin e asaj që e cilëson një prej krizave më të rënda politike me të cilat po përballet Shqipëria.
Të lidhura
None found
Sipas Salianjit, selia e Partisë Demokratike duhej të shërbente në këto momente si qendra e rezistencës. Ai shprehet se opozita duhej të zhvillonte konferenca shtypi çdo orë, të bënte denoncime publike dhe të mbështeste pa lëkundje protestuesit e studentët që raportojnë keqtrajtim, në vend që të heshtte. Gjithashtu, ai përmend informacione që qarkullojnë për largimin nga kryeqyteti të drejtuesve të lartë të opozitës pikërisht gjatë këtyre momenteve kritike.
Duke vënë në dukje se protesta zhvillohen në shumë vende të Europës, Salianji thotë se veçoria tragjike e rastit shqiptar është se qytetarët duket se nuk i besojnë më as qeverisë dhe as forcave që paraqiten si zëvendësuese të saj. Për të, mosbesimi përfshin të gjithë sistemin politik dhe nuk kufizohet vetëm te qeverisja.
Ai argumenton se një opozitë që trembet nga zemërimi i qytetarëve po aq sa pushteti nuk mund t’u japë atyre shpresë. Sipas tij, kur ajo nuk reagon ndaj padrejtësive dhe mungon në kohën kur të rinjtë protestojnë për dinjitetin e të ardhmen e tyre, nuk përfaqëson një alternativë, por bëhet pjesë e krizës dhe e sistemit që ka braktisur shqiptarët.
Në këtë kontekst, Salianji i kërkon Sali Berishës që sot të hapë krahun, duke i dhënë protestës më shumë vrull. Sipas vlerësimit të tij, pa Berishën, Rama bie brenda javës.
Pamundësia e qytetarëve për të dalluar pushtetin nga opozita, sipas Salianjit, tregon më shumë sesa një krizë përfaqësimi: ajo dëshmon falimentimin e të gjithë sistemit politik. Ai e cilëson këtë një dështim politik dhe moral të një klase që, në vlerësimin e tij, nuk ka më të drejtë të flasë në emër të shqiptarëve.
Salianji thekson se vendit i duhet një alternativë e mirëfilltë dhe jo thjesht ndërrimi i pushtetit mes atyre që kanë humbur besimin qytetar. Ai bën thirrje për një politikë që t’i bashkohet protestës në vend që t’i druhet asaj dhe, duke thënë se nxënësit e studentët ia kanë dalë, kërkon të bëhet gjithçka për t’i ndihmuar. Sipas tij, një Shqipëri dinjitoze ndërtohet bashkë me ta.
