Organizata Botërore e Shëndetësisë fokusohet te infertiliteti në raportin e saj të ri, i cili ka dal në përfundimin se një në gjashtë njerëz në mbarë botën ka një problem.
Në veçanti, sipas studimit prej 98 faqesh, 17.5% e popullsisë së rritur të botës – pothuajse një në gjashtë – do të përjetojnë infertilitet në një moment të jetës së tyre.
Këto shifra janë vlerësimet e para të Agjencisë për shkallën e infertilitetit në më shumë se një dekadë.
Siç tha Tedros Adhanom Ghebreyesus, drejtori i përgjithshëm i OBSH-së, raporti thekson seriozitetin e infertilitetit si një çështje e shëndetit publik dhe nevojën urgjente për të zgjeruar aksesin në parandalimin, diagnostikimin dhe trajtimet.
“Raporti zbulon një të vërtetë të rëndësishme – infertiliteti nuk diskriminon. Përqindja e njerëzve të prekur tregon nevojën për të zgjeruar aksesin në kujdesin e fertilitetit dhe për të siguruar që kjo çështje të mos anashkalohet më në politikat kërkimore dhe shëndetësore për mënyra të sigurta, efektive dhe me kosto efektive për të arritur lindjen e fëmijëve dhe për të qenë në dispozicion të atyre që i kërkojnë”, tha Tedros.
Sipas OBSH-së dhe siç raporton Agjencia e Lajmeve të Athinës, indikacionet nuk janë të mjaftueshme për të ditur nëse shfaqja e fenomenit është më e shpeshtë apo jo.
Çuditërisht, vlerësimet e reja të OBSH-së, bazuar në mbi 100 studime të kryera nga viti 1990 deri në vitin 2021, tregojnë variacion të kufizuar në praninë e fenomenit nga rajoni në rajon.
Normat e infertilitetit janë të krahasueshme për vendet me të ardhura të larta, të mesme dhe të ulëta, duke sugjeruar se infertiliteti është një sfidë serioze shëndetësore në çdo komunitet, vend dhe rajon të botës.
Prevalenca gjatë gjithë jetës është 17.8% në vendet me të ardhura të larta dhe 16.5% në vendet me të ardhura të ulëta dhe të mesme.
“Për miliona njerëz në mbarë botën, rruga drejt prindërimit mund të jetë e vështirë, nëse jo e pamundur. Në nivel global, vlerësohet se një në gjashtë persona preket nga pamundësia për të pasur një fëmijë në një moment të jetës së tyre. Kjo pavarësisht se ku jeton dhe çfarë burimesh ka”, shtoi Tedros.
Infertiliteti është një gjendje e sistemit riprodhues të mashkullit apo femrës, e përcaktuar nga pamundësia për të arritur shtatzëni pas 12 ose më shumë muajsh marrëdhënie të pambrojtura, thuhet në raport. Mund të shkaktojë stres dhe shqetësim intensiv, stigmatizim dhe vështirësi financiare dhe të ndikojë në gjendjen mendore të personit.
Cilat janë shkaqet?
“Shkaqet e infertilitetit janë të ndryshme dhe shpesh komplekse, është diçka që mund të përjetohet nga burrat dhe gratë. Në të vërtetë, një gamë e gjerë njerëzish në të gjitha rajonet mund të kenë nevojë për kujdes të fertilitetit. Qasja në shërbimet e shëndetit seksual dhe riprodhues është mënyra kryesore që njerëzit të kenë shanset më të mira për të pasur numrin e fëmijëve që dëshirojnë. Megjithatë, në shumicën e vendeve këto shërbime janë të pamjaftueshme”, vuri në dukje Tedros.
Pavarësisht shkallës së çështjes, zgjidhjet për të parandaluar, diagnostikuar dhe trajtuar infertilitetin – duke përfshirë riprodhimin e asistuar (i njohur si in vitro ose IVF) mbeten të pafinancuara dhe të paarritshme për shumë për shkak të kostove të larta, stigmës sociale dhe disponueshmërisë së kufizuar, thotë raporti.
Në shumicën e vendeve trajtimet e fertilitetit financohen kryesisht nga privatët, duke rezultuar shpesh në kosto të mëdha financiare.
Njerëzit në vendet më të varfra shpenzojnë një pjesë më të madhe të të ardhurave të tyre për kujdesin e fertilitetit sesa njerëzit në vendet më të pasura, thotë raporti.
Kostot e larta i pengojnë njerëzit të kenë qasje në trajtime për të trajtuar infertilitetin ose mund t’i zhysin ata në varfëri si rezultat i kërkimit të një kujdesi të tillë, shtoi raporti.
Megjithëse ky raport i ri paraqet prova bindëse të prevalencës së lartë të infertilitetit në nivel global, ai ende tregon një mungesë të vazhdueshme të të dhënave në shumë vende dhe disa rajone. /albeu.com
