Martesa në xhami, Sara Gjordeni e sqaron për publikun: Nuk jam konvertuar në fenë islame

Sara Gjordeni dhe Bardhi u martuan në xhami gjatë muajit të Ramazanit, sipas riteve të fesë islame, besim të cilës i përket këngëtari.

Duke folur pikërisht për këtë në Prive TV, Sara e cila i përket besimit të krishterë-ortodoks, deklaroi se ishte pikërisht toleranca e besimeve që e bënte të veçantë lidhjen e tyre.
“Bardhi ka pasur dëshirë vitin që shkoi, por të gjithë e dimë se sa intensiv ka qenë viti i kaluar dhe kjo ishte arsyeja pse e shtymë kaq shumë. E pamë që pati kritika, [na thanë] ‘po ju keni fëmijë’, megjithatë ne nuk kemi bërë asgjë, të cilën hoxha nuk na e quajti që ishte në rregull, kështu që për sa kohë ne kishim fjalën e tij, që gjithçka që ne po ndiqnim ishte e saktë, opinionet nuk vlenin shumë”, deklaroi Sara në intervistë.

“Nuk ka rëndësi fare besimi i tjetrit, kur vjen puna tek rutina jonë tek dëshirat tona. Duket se e kemi respektin të instaluar tek njëri-tjetri, sa i përket besimit, nuk është se [unë dhe Bardhi] i kemi vendosur njëri-tjetrit rregulla që ‘shiko ti do të bësh këtë’ sepse besimi im nuk e toleron”, pohoi ajo.

“[Martesa në xhami] sigurisht që ishte e çuditshme, unë nuk kam qenë asnjëherë në praninë e një hoxhe apo një xhamie, sigurisht kam kaluar koxha kohë me njerëz të besimit myslimanë, pasi nëna ime e ka komplet familjen që i përket këtij besimi, sigurisht kam parë Bardhin të falej apo të lexonte Kuran. E gjithë eksperienca ime ishte paqësore dhe më dha një ndjesi shumë të mirë”.

“Gjatë kohës duke kryer ritin, hoxha na dha një leksion, atë që duhet të dinte burri dhe atë që duhet të dinte gruaja, secilit nga një fjali dhe sigurisht ishin gjëra që na bënte të reflektonim dhe më pëlqeu shumë”, potencoi ish-banorja e BBVA-s.

Sara po ashtu e rikonfirmoi edhe një herë për publikun që nuk është konvertuar në fenë islame, ndonëse u aludua shumë në internet, pas fotografive të publikuara të martesës, ku ishte e mbuluar me shami.

Përveç kësaj, ajo po ashtu bëri të ditur se do të jetë pjesë e një projekti në Top Channel në rolin e moderatores, emisioni “Vajzë apo djalë” me një tematikë të veçantë.


Shtuar 3.04.2025 12:49

Tags: ,