Protestat kundër pabarazisë sociale dhe financimit të pamjaftueshëm të shërbimeve publike u zhvilluan në disa qytete të Francës të shtunën. Në Marsejë pati përplasje mes demonstruesve dhe policisë, ndërsa në Paris mijëra njerëz dolën në rrugë. Siç raportoi The New York Times, situata u tensionua në disa prej zonave ku u mbajtën tubime.
Në Marsejë, përplasjet nisën pranë Porte d’Aix, pikës ku duhej të përfundonte një marshim i autorizuar. Disa të rinj, pjesa më e madhe me maska kundër gazit ose maska skijimi, zhvendosën pllaka të mëdha metalike në rrugë për të krijuar barrikada.
Të lidhura
None found
Demonstruesit hodhën gurë e shishe në drejtim të policisë, ndërsa disa lëshuan fishekzjarrë ndaj efektivëve. Forcat e rendit u përgjigjën me sasi të mëdha gazi lotsjellës dhe, në një moment, avancuan me mburoja e shkopinj gome për ta shtyrë turmën prapa.
Gazi u përhap edhe në një rrugicë pranë vendit të protestës, duke bërë që demonstruesit të largoheshin me nxitim drejt sheshit.
Në kryeqytet, vendi ku do të mbahej demonstrata u ndryshua në çastet e fundit. Megjithatë, mijëra qytetarë u mblodhën në zonën e caktuar në juglindje të Parisit.
The New York Times raportoi se ndryshimi i vendndodhjes shkaktoi pakënaqësi te disa pjesëmarrës, të cilët menduan se vendimi synonte të zvogëlonte dukshmërinë e protestës.
“Është një strategji për t’i përçarë dhe dekurajuar njerëzit”, tha Vincent Charache, 35 vjeç. Punonjësi bashkiak kishte udhëtuar dy orë me tren nga Nevers për të protestuar kundër thellimit të hendekut mes të pasurve dhe të varfërve.
Meylan Eponoh, 19 vjeç, student i punës sociale, tha se demonstruesit kundërshtonin gjithashtu financimin e pamjaftueshëm të shkollave në zonat ku jetojnë shtresat punëtore.
“Ata duan të na bëjnë të padukshëm në periferi të Parisit”, u shpreh ai. Eponoh tha se shpresonte që marshimi të ndryshonte drejtim dhe të hynte në qendër të qytetit.
Në Orléans, ndryshe nga Marseja, tubimi u mbyll paqësisht. Mijëra persona që kishin dalë në rrugë gjatë mëngjesit u grumbulluan në një hapësirë ku vullnetarët shpërndanin ushqim dhe pije.
Nga një skenë e ngritur në atë zonë, politikanë, përfshirë kryebashkiakun e Trappes, Ali Rabeh, dhe nxënës të shkollave të mesme iu drejtuan turmës me fjalime, që u pritën me brohoritje.
Laurent Nuñez, zyrtar i Ministrisë së Brendshme franceze, bëri të ditur se deri gjatë së shtunës ishin arrestuar 135 persona.
Shumica u ndaluan gjatë kontrolleve policore, pasi dyshohej se mbanin armë ose sende të tjera të ndaluara. Mes sendeve të sekuestruara u gjetën pajisje për lëshimin e fishekzjarrëve dhe një shpatë japoneze e stilit samurai.
Nuñez tha se në protestat në mbarë vendin kishin marrë pjesë rreth 35 mijë persona, më pak se në të njëjtën periudhë të së shtunës së kaluar. “Do të mbetemi jashtëzakonisht vigjilentë gjatë pasdites së sotme”, deklaroi ai.
Për masat e sigurisë gjatë protestave, autoritetet franceze angazhuan rreth 70 mijë efektivë policie në të gjithë vendin.
