Me 44.5% të votave në zgjedhjet rajonale, Ulrich Siegmund, 35-vjeçari i AfD-së, e udhëhoqi partinë e ekstremit të djathtë drejt fitores në Saksoni-Anhalt.
Të lidhura
None found
Ky rezultat përbën një zhvillim të paprecedentë për AfD-në, e cila për herë të parë renditet si forca kryesore në zgjedhjet për parlamentin e një landi gjerman. Fitorja e ka vendosur Siegmundin në qendër të vëmendjes politike në Gjermani dhe e ka ngritur atë mes figurave më të rëndësishme të së djathtës ekstreme.
Karriera e tij nuk nisi në institucionet politike. Para se të bëhej një emër i njohur, Siegmund fitoi popullaritet në rrjetet sociale, sidomos gjatë pandemisë, kur publikonte video në TikTok kundër masave të qeverisë.
Ai kundërshtonte përdorimin e maskave, vaksinimet dhe kërkesat e tjera të autoriteteve, të cilat i përshkruante si “të çmendura”. Duke komunikuar me një ton miqësor dhe optimist, ai tërhoqi miliona shikues dhe krijoi një bazë të gjerë ndjekësish në internet.
Aktualisht, Siegmund ndiqet nga më shumë se 850 mijë persona në TikTok, një numër i jashtëzakonshëm për një politikan gjerman. Gjatë fushatës, ai e përdori intensivisht këtë platformë, duke regjistruar me telefonin e tij aktivitetet politike dhe turmat që e mbështesnin.
Paula Diehl, profesoreshë në Universitetin e Kielit, ka vlerësuar se aktivitetet e Siegmundit nuk u drejtohen vetëm pjesëmarrësve të pranishëm, por mbi të gjitha audiencës online.
Në vitin 1990, vetëm disa javë pas ribashkimit të Gjermanisë Lindore me atë Perëndimore, lindi Ulrich Siegmund. Fëmijërinë e kaloi në Tangermünde, në lindje të Gjermanisë, një zonë që pas ribashkimit u përball me rënie të ekonomisë, punësimit dhe popullsisë.
Kur ishte në të 20-at, ai punoi si menaxher llogarish në një ofrues shërbimesh shëndetësore. Më vonë themeloi në Berlin një biznes që merrej me shitjen e aromatizuesve të ambienteve.
Rrugëtimin politik e nisi në Bashkimin Kristian Demokrat, CDU, por në vitin 2014 u bashkua me AfD-në. Sipas tij, ai u largua nga CDU-ja për shkak të strukturave të ngurta të partisë, ndërsa në AfD pa një forcë që kundërshtonte politikat e qeverisë qendrore në Berlin.
Mandatin e parë si deputet në parlamentin e Saksoni-Anhaltit e fitoi në vitin 2016, kur AfD mori 24% të votave.
Gjatë pandemisë, prania e tij në TikTok e rriti ndjeshëm njohjen në nivel kombëtar. Videot e shndërruan Siegmundin në një prej figurave më të njohura të AfD-së dhe i dhanë mundësinë të komunikonte drejtpërdrejt me votuesit.
Ndryshe nga shumë drejtues të tjerë të AfD-së, Siegmund njihet për një mënyrë komunikimi të qetë, pozitive dhe miqësore. Megjithatë, krahas këtij stili, ai mbron qëndrime të ashpra për emigracionin dhe çështje të tjera politike.
AfD-ja ka premtuar dëbime masive të emigrantëve dhe ka deklaruar se Islami nuk pajtohet me Kushtetutën gjermane. Në programin e saj, partia ka propozuar edhe shkurtimin e fondeve për transmetuesit publikë, ndalimin e flamujve të paradave të krenarisë në shkolla dhe zgjerimin e mësimit të gjuhës ruse.
Autoritetet gjermane të inteligjencës e kanë klasifikuar AfD-në si të dyshuar për ekstremizëm. Disa prej drejtuesve të saj kanë shfaqur qëndrime pranë Rusisë dhe kanë bërë deklarata kontroverse për periudhën naziste.
Edhe Siegmundi është përfshirë në debate për mënyrën se si e trajton të kaluarën naziste të Gjermanisë. Në një intervistë për një podcast, ai deklaroi se nuk mund të përcaktonte nëse Holokausti ishte krimi më i rëndë në historinë njerëzore.
Po ashtu, ai nuk pranoi t’i dënonte mbështetësit që kishin brohoritur emrin e tij duke përdorur përshëndetjen naziste “Sieg Heil”.
Gjatë fushatës, Siegmund përdori edhe nostalgjinë për Gjermaninë Lindore si pjesë të profilit të tij politik. Ndonëse ka lindur pas rënies së saj, në disa aktivitete ai u shfaq duke udhëtuar me një motor Simson, të lidhur ngushtë me jetën e përditshme në Gjermaninë Lindore gjatë periudhës komuniste.
Në një aktivitet elektoral u këndua himni i ish-Gjermanisë Lindore. Ky veprim shkaktoi polemika dhe bëri që edhe disa figura të AfD-së të distancoheshin prej tij.
Paralelisht, Siegmund u përpoq të përcillte një mesazh shprese për të ardhmen, duke kanalizuar pakënaqësinë e votuesve lidhur me papunësinë, kostot e jetesës dhe vështirësitë ekonomike.
“Gjërat po shkojnë keq kudo dhe ky është një vend i keq dhe demotivues për të filluar. Unë dua që gjërat të fillojnë të ecin përpjetë”, është shprehur ai.
Në gusht, revista gjermane Der Spiegel e përshkroi Siegmundin si “njeriun më të rrezikshëm në Gjermani”. Ky vlerësim lidhej pjesërisht me stilin e tij optimist e miqësor, i cili, sipas kritikëve, i bën më të pranueshme për disa votues politikat e ashpra të AfD-së.
Mbështetësit e tij e shndërruan këtë cilësim në një simbol krenarie dhe gjatë takimeve elektorale i kërkuan të firmoste kopje të revistës.
Siegmund ka deklaruar se aftësia për të komunikuar dhe për të motivuar njerëzit përbën një prej pikave të tij më të forta.
“Unë mund të jap motivim, të krijoj një ndjenjë optimizmi dhe t’i bëj gjërat të ecin përsëri përpara”, ka thënë ai.
Fitorja e AfD-së në Saksoni-Anhalt e ka kthyer Ulrich Siegmundin në një prej figurave qendrore të së djathtës ekstreme në Gjermani. Pas një rrugëtimi që kaloi nga videot në TikTok dhe biznesi i aromatizuesve, ai tashmë ndodhet në qendër të një prej zhvillimeve më të rëndësishme politike në vend.
