Shtetet e Bashkuara do të shënjestrojnë një urë ose një termocentral iranian sa herë që Teherani sulmon një anije në Ngushticën e Hormuzit, deklaroi të mërkurën presidenti Donald Trump në një mesazh të ashpër.
Të lidhura
None found
Përmes platformës Truth Social, udhëheqësi amerikan theksoi se SHBA do të reagojë menjëherë ndaj çdo sulmi të Iranit kundër anijeve në këtë rrugë strategjike ujore, pavarësisht nëse përdoren raketa, predha, dron apo çdo lloj arme tjetër.
Ky kërcënim erdhi në një moment kur rebelët Huthi në Jemen, të mbështetur nga Irani, kanë vënë në shënjestër një tjetër korridor jetik për naftën botërore. Pesë cisterna ndryshuan kursin në Detin e Kuq të mërkurën për t’iu shmangur Ngushticës Bab el-Mandeb, pas paralajmërimeve të Huthëve për bllokim të eksporteve saudite. Tri anije të ngarkuara me naftë saudite për Kinën dhe Indinë ishin kthyer mbrapsht një ditë më parë.
Reagimi nga Teherani nuk vonoi. Mohammad Baqer Qalibaf, kreu i Parlamentit iranian dhe negociatori kryesor në bisedimet për armëpushim, paralajmëroi më 22 korrik se në rast të zbatimit të kërcënimit amerikan, asnjë infrastrukturë nuk do të ishte e sigurt. Në një postim në X, ai shtoi se paqja në Ngushticën e Hormuzit mund të rikthehet vetëm pas largimit të forcave amerikane.
Bllokada pothuajse totale e Ngushticës së Hormuzit nga Irani ka ushqyer inflacionin global, ndërsa rreziku i ri për detarinë pranë Ngushticës Bab el-Mandeb i ka shtyrë çmimet e naftës pranë niveleve më të larta në gati gjashtë javë. Arabia Saudite ka ridrejtuar miliona fuçi nafte çdo ditë drejt portit të Yanbu në Detin e Kuq për të anashkaluar Hormuzin, por bllokada e mundshme e rrugës jugore nga Huthët do t’i detyronte dërgesat të përdorin Kanalin e Suezit, duke zgjatur udhëtimin me javë dhe rritur kostot.
Sulmet ajrore amerikane janë zhvendosur nga jugu drejt zonave perëndimore dhe qendrore të Iranit. Natën e njëmbëdhjetë radhazi, banorët e Teheranit dëgjuan shpërthime nga aktivizimi i sistemeve të mbrojtjes ajrore mbi kryeqytet, sipas agjencisë Fars. Në provincën Bushehr, ku gjendet centrali i vetëm bërthamor iranian, u goditën tre lokacione, përfshirë një nënstacion elektrik pranë tij. Objektiva u raportuan edhe në qarkun Kabudarahang të provincës Hamadan.
Ndërkohë, ushtria iraniane njoftoi se kishte shënjestruar objekte akomodimi dhe magazinimi në bazën Al Azraq në Jordani, si dhe hangarë mirëmbajtjeje në bazën Sheikh Isa në Bahrejn dhe Kampin Doha në Kuvajt. Autoritetet e këtyre vendeve pohuan se kishin zmbrapsur sulmet. Një zyrtar i Ministrisë iraniane të Shëndetësisë tha se 53 civilë janë vrarë dhe 592 janë plagosur që nga fundi i muajit të kaluar, megjithëse ushtria amerikane këmbëngul se nuk synon kurrë civilë. Nga ana tjetër, 18 ushtarakë amerikanë kanë humbur jetën dhe mbi 450 janë plagosur.
Trump mori pjesë në një ceremoni në Bazën Ajrore Dover në Delauerë për katër ushtarët e rënë në sulmet iraniane mbi baza në Jordani dhe Irak. Duke e cilësuar si një nga detyrat më të rënda të presidencës, ai theksoi se ishte një detyrim që duhej përmbushur.
Në planin diplomatik, sekretari amerikan i Shtetit Marco Rubio akuzoi Iranin se nuk po tregohet serioz në bisedime, duke shtuar se pranimi i kontrollit iranian mbi Ngushticën e Hormuzit do të krijonte një precedent të rrezikshëm për rajone të tjera si Deti i Kinës Jugore. Gjatë një takimi të ministrave të Jashtëm të Azisë Juglindore në Manila, Rubio theksoi se SHBA do të veprojë për të mbrojtur interesat e saj dhe të aleatëve nëse Teherani nuk angazhohet realisht.
