Një ngjarje makabre ka shokuar komunitetin e Grand Haven Township në Michigan, ku autoritetet zbuluan trupat e tetë anëtarëve të një familjeje në një skenë të tmerrshme krimi. Dyshimet e para tregojnë se një 47-vjeçar kreu një masakër ndaj bashkëshortes dhe fëmijëve të tij, përpara se t’i jepte fund jetës së vet.
Të lidhura
None found
Viktimat u identifikuan si Christopher Karolkiewicz, 47 vjeç, gruaja e tij Amanda “Maddie” Karolkiewicz, 39 vjeçe, dhe gjashtë fëmijët e çiftit, moshat e të cilëve varionin nga 5 deri në 15 vjeç. Trupat e tyre u gjetën në banesën e familjes, që ndodhet pranë brigjeve të Liqenit Michigan.
Sipas të dhënave fillestare nga hetuesit, Christopher së pari hapi zjarr ndaj anëtarëve të familjes së tij. Më pas, ai dyshohet se ndezi disa zjarre në dhoma të ndryshme të shtëpisë, duke shkaktuar një përhapje të shpejtë të flakëve. Në fund, ai vetëqëlloi me armën e krimit.
Alarmi u dha nga fqinjët që vunë re tym të bardhë që dilte nga godina. Forcat zjarrfikëse dhe ekipet e shpëtimit iu deshën rreth tre orë për të gjetur origjinën e zjarrit dhe për të depërtuar brenda strukturës, ku hasën tetë trupat e pajetë.
Disa prej viktimave u zbuluan në dhomat e tyre të gjumit. Rezultatet e autopsisë treguan se të gjithë kishin ndërruar jetë nga plagët e marra me armë zjarri dhe jo nga djegiet, duke përjashtuar kështu mundësinë që flakët të ishin shkaku kryesor i vdekjeve.
Hetuesit janë të bindur se zjarri u vu qëllimisht në disa pika të banesës pas përfundimit të masakrës, por ende po punojnë për të përcaktuar mekanizmin e saktë të ndezjes së flakëve. Fatkeqësisht, as kafshët shtëpiake të familjes nuk arritën t’i shpëtonin katastrofës.
Mediat amerikane raportojnë se Christopher dhe Amanda u takuan për herë të parë në vitin 2008 në ambientet e punës së tyre të përbashkët dhe lidhën kurorë në gusht të vitit pasardhës. Çifti pati katër fëmijë biologjikë dhe më vonë zgjeroi familjen duke adoptuar dy vajza.
Megjithatë, pas imazhit publik të një jete të rregullt familjare, dukej se kishte çarje të thella në marrëdhënien e tyre. Rreth tetë vite më parë, Christopher kishte nisur një raport jashtëmartesor me një praktikante shumë më të re në punë, një sjellje që me sa duket përsëritej.
Dy vjet më parë, Amanda kishte ndarë dhimbjen e saj në platformën online Reddit, ku rrëfeu se burri i saj e kishte tradhtuar përsëri me një tjetër praktikante. Në shkrimet e saj, ajo përshkruante se si, pas shumë vuajtjesh, arriti në përfundimin se duhej të mbështetej mbi forcat e veta për të ecur përpara.
Autoritetet lokale po vazhdojnë pa ndërprerë punën hetimore për të sqaruar të gjitha rrethanat dhe motivet që çuan në këtë tragjedi të rëndë familjare.
