Një traget pasagjerësh është përmbysur dhe më pas është fundosur në brigjet e Qipros, duke shkaktuar vdekjen e të paktën tetë personave. Sipas të dhënave të fundit, 18 persona vijojnë të jenë të zhdukur.
Të lidhura
None found
Anija kishte në bord 259 pasagjerë dhe tetë anëtarë ekuipazhi. Ajo nisi të mbushej me ujë pak pasi u largua nga qyteti bregdetar i Kyrenias, të dielën rreth orës 12:30 sipas kohës lokale.
Pas ngjarjes, autoritetet kanë ndaluar kapitenin e tragetit dhe shtatë pjesëtarët e tjerë të ekuipazhit. Ndërkohë, ka nisur hetimi për të përcaktuar shkaqet dhe rrethanat e fundosjes.
Pjesa më e madhe e personave që ndodheshin në bord është shpëtuar. Operacioni i kërkim-shpëtimit vijon në zonën e incidentit në bashkëpunim me autoritetet turke.
Në vendngjarje janë angazhuar helikopterë dhe anije të rojes bregdetare, ndërsa në breg janë vendosur ambulanca për t’u ardhur në ndihmë personave të shpëtuar.
Ekipet po punojnë gjithashtu për gjetjen dhe nxjerrjen e regjistruesit të të dhënave të anijes, i njohur si “kutia e zezë”, i cili mund të japë të dhëna për zbardhjen e shkaqeve të aksidentit.
