Afro 3 milionë dollarë kompensim janë shpërndarë nga qeveria e Shteteve të Bashkuara për punonjësit amerikanë që janë prekur nga e ashtuquajtura “Sindroma e Havanës”, një gjendje neurologjike misterioze që prej vitesh ka goditur spiunë, diplomatë dhe familjarë të tyre.
Të lidhura
None found
Këto përbëjnë pagesat e para zyrtare që u jepen punonjësve të shërbimit amerikan në lidhje me këtë sindromë, e cila u raportua fillimisht rreth një dekadë më parë nga oficerë të CIA-s të dislokuar në Havana, kryeqytetin e Kubës.
Më pas, episode të ngjashme janë denoncuar edhe nga diplomatë dhe punonjës amerikanë në vende të tjera, përfshirë Kinën, të cilët kanë treguar për incidente të pazakonta që kanë ndikuar në gjendjen e tyre shëndetësore.
Të prekurit kanë raportuar simptoma si tinguj të çuditshëm në vesh, kërcitje, fishkëllima, ndjesi të forta presioni në kokë, marramendje, të përziera dhe shqetësime të tjera neurologjike.
Për shumë vite, “Sindroma e Havanës” është shoqëruar me spekulime të shumta. Disa hipoteza kanë ngritur mundësinë që simptomat të jenë shkaktuar nga ekspozimi ndaj mikrovalëve ose nga përdorimi i një arme të avancuar me energji të drejtuar, duke ushqyer dyshimet për përfshirjen e një fuqie të huaj në sulme kundër personelit amerikan jashtë territorit të SHBA-së.
Megjithatë, një vlerësim i publikuar vitin e kaluar nga shumica e agjencive amerikane të inteligjencës arriti në përfundimin se është “shumë e pamundur” që dëmtimet e raportuara të jenë shkaktuar nga një shtet i huaj përmes përdorimit të një arme inovative ose një pajisjeje prototip.
Ndonëse burimi i saktë i kësaj sindrome vijon të mbetet i paqartë, vendimi i autoriteteve amerikane për të dëmshpërblyer të prekurit përfaqëson një pranim zyrtar të pasojave të rënda shëndetësore që këta punonjës kanë raportuar gjatë shërbimit të tyre jashtë vendit.
