Pas gjashtë vitesh nga largimi prej detyrave aktive mbretërore dhe vendosjes në Shtetet e Bashkuara, Princi Harry dhe Meghan Markle pritet të rikthehen në Britani, një zhvillim që mund të ndikojë në të ardhmen e familjes mbretërore britanike.
Të lidhura
None found
Duka dhe Dukesha e Sussex-it pritet të jetojnë me dy fëmijët e tyre, Princin Archie dhe Princeshën Lilibet, në një rezidencë private në periferi të Londrës. Ky hap nuk lidhet me një rikthim në angazhimet zyrtare të monarkisë, por prania e përhershme e çiftit në vend mund të trazojë më tej raportet tashmë të brishta brenda familjes mbretërore.
Harry dhe Meghan do të vazhdojnë të kenë statusin e anëtarëve privatë të familjes dhe Pallati nuk pritet të rikthejë modelin e mëparshëm të angazhimit që ekzistonte përpara largimit të tyre nga detyrat mbretërore në vitin 2020.
Megjithatë, vendosja e tyre sërish në Britani e ka kthyer vëmendjen te raporti i vështirë i Harry-t me vëllain e madh, Princin William.
Përplasjet mes dy vëllezërve janë shtuar pas largimit të Harry-t dhe Meghan-it, deklaratave publike të tyre, intervistës me Oprah Winfrey dhe botimit të kujtimeve të Harry-t, “Spare”.
Sipas “The Telegraph”, William dhe bashkëshortja e tij, Kate Middleton, u njoftuan për vendimin e Sussex-ëve rreth 24 orë para se ai të bëhej publik. Deri tani, trashëgimtari i fronit nuk ka bërë ndonjë reagim publik.
Peter Hunt, ish-redaktor mbretëror i BBC-së, ka shprehur shqetësimin se rikthimi i Harry-t mund ta vërë William-in përballë një situate të re dhe të ushqejë idenë e krijimit të “dy oborreve rivale” në të ardhmen.
Hunt vlerëson se Harry mund të ketë një afërsi më të madhe me të atin, Mbretin Charles III, ndërsa prania e tij në Britani mund t’ia vështirësojë William-it shmangien e një pajtimi me vëllain.
Charles III mësohet se ka marrë dijeni për vendimin e të birit vetëm tre ditë para njoftimit zyrtar.
Për mbretin, kthimi i Harry-t dhe Meghan-it mund të sjellë mundësinë e takimeve më të shpeshta me djalin e tij dhe dy nipërit, Archie dhe Lilibet.
Gjatë viteve të fundit, Charles ka treguar se dëshiron ta mbajë të hapur komunikimin me Harry-n. Megjithatë, marrëdhënia mes dy vëllezërve vazhdon të mbetet një nga problemet më delikate për familjen mbretërore.
Në maj të vitit 2025, Harry i tha BBC-së se dëshironte të pajtohej me familjen e tij. Ai shprehu gjithashtu keqardhjen që fëmijët e tij nuk kishin pasur mundësinë ta njihnin më mirë vendin e origjinës së tij.
Ky vendim ka ngritur pikëpyetje edhe për qëndrimin e Meghan Markle ndaj rikthimit.
Analistja mbretërore Jenny Bond deklaroi për Sky News se Meghan mund të jetë duke bërë një “sakrificë” për familjen, pasi mbetet e paqartë nëse kthimi në Britani është dëshira e saj personale.
Sipas Bond, një prej arsyeve kryesore të çiftit duket të jetë synimi për t’u krijuar fëmijëve një lidhje më të fortë me Britaninë.
Ndërkohë, Meghan pritet të vijojë aktivitetet e saj në biznes dhe të mbajë nën kontroll markën e stilit të jetesës, “As Ever”.
Persona pranë çiftit kanë thënë se dëshira e Harry-t që fëmijët e tij të arsimohen në sistemin britanik ka qenë ndër shtysat kryesore të këtij vendimi.
Archie dhe Lilibet thuhet se janë regjistruar në një shkollë britanike, ku pritet të nisin mësimin në shtator.
Në korrik, Charles III dhe bashkëshortja e tij, Camilla, u takuan në Londër me Harry-n, Meghan-in dhe fëmijët e tyre. Ky ishte takimi i parë i këtij lloji pas katër vitesh.
Harry, 41 vjeç, ka udhëtuar disa herë drejt Britanisë gjatë viteve të fundit. Në shkurt 2024, ai takoi të atin pak pasi u bë publike diagnoza e kancerit të Charles-it. Më vonë, në shtator 2025, Harry u ftua për çaj në Clarence House.
Rikthimi i çiftit Sussex pritet të rihapë edhe ndarjet mes britanikëve në opinionin publik.
Marrëdhënia e Harry-t dhe Meghan-it me publikun britanik vazhdon të jetë e ndërlikuar, veçanërisht pas intervistave dhe deklaratave të tyre për periudhën kur ishin pjesë e familjes mbretërore.
Një sondazh i YouGov, i zhvilluar në korrik, tregoi se vetëm 22% e britanikëve kanë opinion pozitiv për Meghan-in, ndërsa 65% kanë qëndrim negativ ndaj saj. Në rastin e Harry-t, 33% shprehen pozitivisht dhe 58% negativisht.
Çifti u martua në vitin 2018 dhe në janar 2020 njoftoi se do të largohej nga detyrat aktive mbretërore. Dy muaj më pas, Harry dhe Meghan u zhvendosën në Kaliforni, ku nisën jetën larg familjes mbretërore.
Gjashtë vite më vonë, rikthimi i tyre në Britani nuk përfaqëson një kthim në detyrat mbretërore, por mund të ndryshojë edhe një herë ekuilibrat brenda monarkisë, sidomos marrëdhënien mes Harry-t, William-it dhe Charles-it.
