Një çift nga Flint Township, në shtetin amerikan të Miçiganit, është vënë nën akuzë për vrasje të shkallës së dytë, abuzim ndaj fëmijës dhe torturë, pas vdekjes së djalit të tyre 7-vjeçar, i cili në momentin kur humbi jetën peshonte rreth 116 kilogramë.
Sipas prokurorisë, Damien O’Brien, 40 vjeç, dhe bashkëshortja e tij Jessica O’Brien, 41 vjeç, e lanë të birin, Casper, të përballej për një kohë të gjatë me neglizhencë ekstreme.
Të lidhura
None found
Fëmija vdiq më 4 nëntor 2025, pasi ishte dërguar me urgjencë në spital. Në raportin mjekësor thuhet se shkaku i vdekjes ishte kardiomiopatia e dilatuar, një sëmundje që çon në dështim të zemrës, ndërsa obeziteti morbid u vlerësua si faktor kontribuues.
Casper ishte 127 centimetra i gjatë dhe peshonte 116 kilogramë, një peshë shumë më e lartë se norma për një fëmijë të asaj moshe.
Prokurori i Qarkut Genesee, David Leyton, tha se ky rast pasqyron një neglizhencë të qëllimshme dhe jashtëzakonisht të rëndë nga ana e prindërve. “Ky fëmijë u përball me vuajtje mizore dhe ekstreme si pasojë e neglizhencës së prindërve të tij”, deklaroi Leyton.
Hetimet treguan se Casper nuk kishte shkuar asnjëherë në shkollë dhe gjatë gjithë jetës së tij ishte kontrolluar vetëm një herë nga një mjek, megjithëse familja kishte sigurim shëndetësor. Autoritetet konstatuan gjithashtu se ai dhe motra e tij 5-vjeçare nuk figuronin të regjistruar në sistemet shtetërore dhe nuk kishin qenë kurrë nën mbikëqyrjen e shërbimeve të mbrojtjes së fëmijëve.
Sipas prokurorit, në mëngjesin kur Casper humbi jetën, prindërit kontaktuan veterinerin e tyre për t’u marrë me qenin e familjes.
Policia e përshkroi banesën ku jetonte familja si një shtëpi në gjendje të rënduar, me grumbullim të madh sendesh. Damien dhe Jessica O’Brien mbahen në paraburgim pa të drejtë lirimi me kusht, ndërsa seanca e tyre e ardhshme në gjykatë është caktuar për 2 korrik.
