Shefja e politikës së jashtme të Bashkimit Evropian, Kaja Kallas, u kërkoi të hënën vendeve anëtare të ruajnë të pandryshuar kursin e sanksioneve ndaj Rusisë, ndërsa po shqyrtohet mundësia e heqjes së disa masave kundër dy oligarkëve rusë.
Të lidhura
None found
Gjatë një konference për shtyp në margjinat e Asamblesë së Përgjithshme të OKB-së, Kallas deklaroi se sanksionet mbeten në qendër të strategjisë së Brukselit për t’i bërë presion Moskës që t’i japë fund luftës në Ukrainë.
Zëvendëspresidentja e Komisionit Evropian dhe shefja e Shërbimit Evropian të Veprimit të Jashtëm sqaroi se disa shtete anëtare kanë kërkuar largimin e disa individëve nga lista e sanksioneve, ndaj edhe bisedimet për këtë çështje po zhvillohen aktualisht.
Kallas shprehu pritshmërinë që diskutimet të mbyllen sa më shpejt të jetë e mundur.
Ajo theksoi se nevojitet stabilitet, çka sipas saj nënkupton që sanksionet duhet të qëndrojnë në fuqi për një periudhë më të gjatë. Për këtë arsye, shtoi Kallas, po punohet për një seri të re masash ndëshkuese.
