Një tjetër kapitull i rëndësishëm në ndjekjen penale ndërkombëtare të krimeve të kryera nga i ashtuquajturi “Shteti Islamik” u mbyll sot në Gjermani. Gjykata e Lartë Rajonale e Mynihut shpalli fajtorë dy shtetas irakianë, Tuana H.S. dhe Azia R.A., duke i dënuar secilin me burgim të përjetshëm. Akuza përfshinte pjesëmarrje në gjenocid, skllavërim fëmijësh, krime kundër njerëzimit dhe krime lufte.
Të lidhura
None found
Ata u arrestuan në prill të vitit 2024 në landin e Bavarisë, pas disa vitesh në arrati. Procesi gjyqësor hodhi dritë mbi tmerret që dyshja u ka shkaktuar dy vajzave të komunitetit jazidi midis viteve 2015 dhe 2017, në territoret e kontrolluara dikur nga ISIS-i mes Irakut dhe Sirisë. Fillimisht, çifti rrëmbeu një fëmijë 5-vjeçare dhe më pas një tjetër 12-vjeçare.
Në banesën e tyre, të miturat mbaheshin si skllave dhe përjetuan një makth të vërtetë dhune të vazhdueshme fizike, torturash psikologjike dhe sulmesh seksuale. Përtej abuzimit brutal, ato detyroheshin me dhunë të përvetësonin ideologjinë ekstremiste të robëruesve të tyre. Trupi gjykues dëgjoi dëshmi tronditëse mbi rolin aktiv dhe sadist të secilit prej të pandehurve.
Tuana H.S. akuzohet se i dhunoi në mënyrë të përsëritur të dyja viktimat. Ndërkohë, bashkëshortja e tij, Azia R.A., kishte një pjesëmarrje po aq makabre në këto akte. Ajo ishte përgjegjëse për përgatitjen e dhomës së abuzimit dhe për lyerjen me grim të vajzave përpara çdo rasti dhunimi. Për më tepër, gruaja u shkaktonte me dashje të miturve djegie në trup dhe i ndëshkonte duke i lënë të qëndronin në një këmbë për periudha të zgjatura kohore.
Kur forcat e “Shtetit Islamik” filluan të tërhiqeshin në vitin 2017, çifti u arratis nga Siria. Megjithatë, në vend që t’i lironin, ata ua kaluan dy vajzat anëtarëve të tjerë të organizatës terroriste, duke bërë që gjurmët e fëmijëve të humbisnin për një kohë të gjatë. Ky vendim i gjykatës gjermane shënon një hap të mëtejshëm thelbësor në përpjekjet për të sjellë para drejtësisë autorët e gjenocidit kundër popullsisë jazide.
