Atletico Madrid – Real Madrid do të jetë lufta për titullin e La Liga 2020-21.
Një duel që do të mbyllet në ditën e fundit pasi të dy ekipet “ Los Colchoneros dhe “Los Blancos” morën nga tre pikë kundër Osasunas dhe Athletic Bilbaos, duke lënë renditjen e tyre dhe hendekun e pikëve praktikisht të pandryshuar, përcjell KosovaPress.
Skuadra e Simeones ruan dy pikë avantazh ndaj Realit dhe në ndeshjen e fundit, më 23 maj, ata përballen me Real Valladolidin jashtë shtëpisë ku do të luftojnë për të mos u mposhtur.
Nga ana tjetër, Madridi do të përballet me finalistin e Ligës së Evropës Villarrealin i cili, potencialisht, mund të arrijë edhe vendin e pestë në renditje.
Për Atletico, siguria për të fituar titullin do të vinte me një fitore në ndeshjen e fundit. Është e mundur të përfundohet në pikë të barabarta në rast barazimi të Atleticos dhe fitores së Realit. Në atë rast do të ishte skuadra e Zidane e cila do të shpallej kampion në sajë të numrit më të madh të pikëve të fituara në ndeshje direkte (një barazim dhe një fitore për Realin).
Kështu që gjithçka është e hapur, por me Atleticon që kanë fatin në duart e tyre.
