Përmbytjet e shkaktuara nga reshjet e dendura të musoneve në Filipine nuk e bindën Liane Galang dhe Gilbert Gibo Chico të anulonin ceremoninë martesore të planifikuar prej kohësh.
Të lidhura
None found
Edhe pse rrugët dhe banesat ishin mbuluar nga uji dhe balta, çifti vendosi të vijonte me dasmën. Betimet martesore u shkëmbyen brenda një kishe të përmbytur, ndërsa pamjet e ceremonisë u shpërndanë më pas në rrjetet sociale.
E veshur me fustanin e bardhë, nusja iu drejtua altarit duke kaluar nëpër ujë që i arrinte deri në bel. Në të njëjtën lartësi ishte uji edhe pranë dhëndrit, priftit, dëshmitarëve dhe fotografëve që regjistruan momentet e veçanta.
Fotot dhe videot nga dasma e pazakontë u përhapën me shpejtësi në internet, në një kohë kur Filipinet po përballen me reshje të dendura të lidhura me musonet jugperëndimore.
Pavarësisht situatës së pazakontë, Liane Galang dhe Gilbert Gibo Chico nuk ndryshuan planet e tyre. Ceremonia e zhvilluar në kishën e përmbytur e shndërroi çiftin në një nga temat më të komentuara në rrjetet sociale.
