Një hetim në ishullin Jeju ka nxjerrë në pah një skandal të rëndë në policinë e Koresë së Jugut, ku një oficer dyshohet se ka mbyllur në mënyrë të parregullt disa dosje personash të zhdukur, me synimin për të shmangur punën e mëtejshme.
Të lidhura
None found
Oficeri, i identifikuar me mbiemrin Boo, është arrestuar nën dyshimin se ka falsifikuar të dhënat zyrtare. Ai u kishte deklaruar familjarëve se kishte kontaktuar me të afërmit e tyre të zhdukur, megjithëse, sipas hetimeve, nuk kishte kryer asnjë komunikim apo verifikim të tillë.
Pas zbulimit të rastit, autoritetet kanë rihapur disa prej dosjeve. Gjatë javëve të fundit janë gjetur katër trupa, ndërsa policia po kontrollon edhe 25 raste të tjera, për të parë nëse ato janë mbyllur para kohe nga i njëjti oficer.
Një nga rastet lidhet me 37-vjeçaren Jang Mi-ran, e cila u raportua e zhdukur në maj nga partneri i saj. Boo dyshohet se i tha partnerit se kishte folur me gruan dhe se ajo nuk dëshironte të takohej apo të kishte kontakte me policinë. Megjithatë, hetimi i mëvonshëm tregoi se ky komunikim nuk kishte ndodhur.
Trupi i Jang u zbulua javën e kaluar pranë një plantacioni palmash në ishullin Jeju. Një tjetër dosje kishte të bënte me një burrë rreth të 60-ave, i raportuar i zhdukur në korrik. Edhe për të, oficeri dyshohet se pretendoi se kishte komunikuar me të dhe se burri nuk donte të kontaktonte me askënd. Ai u gjet i vdekur në fillim të këtij muaji.
Gjatë marrjes në pyetje, oficeri dyshohet se ka pranuar se nuk i kishte trajtuar me seriozitet dosjet që përfshinin persona të rritur, pasi mbyllja e tyre do t’i reduktonte ngarkesën e punës. Për këto veprime ai akuzohet për falsifikim të të dhënave elektronike publike, pengim të detyrës zyrtare dhe shpërdorim detyre.
Autoritetet po analizojnë tani edhe dosjet e tjera të trajtuara nga Boo, me qëllim përcaktimin nëse ka persona të tjerë të zhdukur, rastet e të cilëve janë mbyllur pa u verifikuar realisht fati i tyre.
Çështja ka kaluar përtej përmasave të një skandali policor dhe ka marrë edhe dimension politik në Korenë e Jugut. Presidenti Lee Jae-myung ka premtuar reforma në polici, ndërsa qeveria po përpiqet t’u japë strukturave policore kompetenca më të gjera hetimore, në kuadër të ndryshimeve në sistemin e drejtësisë.
Debati për zgjerimin e këtyre kompetencave zhvillohet në një klimë të tensionuar, pasi policia po përballet me kritika për korrupsion dhe paaftësi. Për këtë arsye, rasti ka shkaktuar reagime të forta në vend.
