Protesta e Partisë Demokratike të Kosovës para objektit të Qeverisë ka hyrë në javën e katërt, ndërsa të hënën kësaj nisme iu bashkuan asamblistë dhe aktivistë të PDK-së nga Skenderaj dhe Istogu. Në protestë është përfshirë edhe Aleanca.
Të lidhura
None found
Kryetari i Skenderajt, Fadil Nura, tha se institucionet e Kosovës duhet të ruhen dhe të forcohen, pasi ato janë ndërtuar mbi sakrificën dhe gjakun e bijve më të mirë të vendit. Ai deklaroi se autoritetet lokale, si pjesë e sistemit kushtetues, kanë detyrim që të veprojnë përtej dallimeve politike dhe të kontribuojnë në mbrojtjen e institucioneve.
Nura u bëri thirrje përfaqësuesve të mazhorancës, veçanërisht VV-së, të reflektojnë për situatën aktuale dhe të marrin përgjegjësinë që u është dhënë nga qytetarët. Sipas tij, institucionet shtetërore duhet të themelohen sa më shpejt, ndërsa ai siguroi se Skenderaj do të qëndrojë pranë deputetëve që mbrojnë sovranitetin, Kushtetutën dhe rendin kushtetues të Republikës së Kosovës.
Fadil Nura: Institucionet e Kosovës duhet të mbrohen dhe të ndërtohen
“Sot jemi këtu për të dëshmuar mbështetjen tonë të fuqishme për deputetët e pranishëm, të cilët po mbrojnë rendin kushtetues dhe demokracinë, që vazhdon të cenohet. Si autoritete lokale dhe pjesë përbërëse të sistemit kushtetues, e konsiderojmë obligim që, pavarësisht bindjeve politike, t’i mbrojmë e t’i ndërtojmë institucionet e Kosovës. Në emër të Komunës së Skenderajt, i bëj thirrje mazhorancës të reflektojë, të përmbushë përgjegjësinë që ia kanë besuar qytetarët, t’i themelojë institucionet e shtetit dhe të ecim përpara. Ne do të jemi sërish në krah të deputetëve të Republikës së Kosovës që mbrojnë sovranitetin, Kushtetutën dhe rendin kushtetues”, tha Nura.
Ali Nimanaj, përfaqësues i degës së PDK-së në Istog, foli për vështirësitë me të cilat po përballen komunat. Ai tha se situata kërkon konstituimin e Kuvendit dhe funksionalizimin e institucioneve.
Nimanaj: Komunat janë pranë kolapsit, institucionet duhet të konstituohen
“Vij nga Istogu dhe shqetësimi ynë është se komunat ndodhen buzë kolapsit. Vendimet që lidhen me buxhetet komunale kanë dëmtuar projektet kapitale të planifikuara, të cilat tashmë nuk mund të realizohen. Prandaj, një nga arsyet kryesore për konstituimin e qeverisë është që ajo të rifillojë punën dhe t’u ndihmojë komunave e qytetarëve”, deklaroi Nimanaj.
Deputeti i PDK-së, Mërgim Lushtaku, falënderoi përfaqësuesit e Skenderajt dhe Istogut për pjesëmarrjen, duke theksuar se protesta nuk përfaqëson më vetëm deputetët e Kuvendit të Kosovës.
Lushtaku: Kjo kauzë tashmë është e të gjithë qytetarëve
“E falënderoj veçanërisht kolegët dhe përfaqësuesit nga Skenderaj e Istogu që erdhën të na mbështesin. Kjo kauzë nuk u përket më vetëm përfaqësuesve të Kuvendit, por të gjithë qytetarëve të vendit. Kur preket shteti dhe Kushtetuta, preket edhe interesi kryesor i qytetarëve, sepse aty përcaktohen përgjegjësitë për zgjidhjen e problemeve të vendit. Përballë çdo cenimi të Kushtetutës dhe shtetit të Kosovës do të na kenë edhe ne, pasi kemi përgjegjësi t’i mbrojmë ato. PDK-ja ka qenë forcë shtetformuese dhe sot më shumë se kurrë na takon ta mbrojmë shtetin”, u shpreh Lushtaku.
Deputetja e Aleancës, Albana Bytyqi, i kërkoi Albin Kurtit të paraqitet në Kuvend, duke e akuzuar se nuk duhet të tallet me besimin e qytetarëve.
Albana Bytyqi: Ejani në Kuvend, krijoni institucionet dhe vazhdojmë punën
“Kosova po përballet prej dy vitesh me mungesë institucionesh, ndërsa gjatë kësaj kohe ka kaluar shqetësime dhe sfida të shumta që kërkojnë zgjidhje. Ne duhet të shkojmë në parlament dhe t’i trajtojmë këto çështje aty ku qytetarët na kanë dhënë besimin. E ftoj edhe një herë Albin Kurtin të mos bëjë hajgare me votën e qytetarëve, të cilët ia dhanë 53 deputetë, por të vijë në Kuvend, t’i krijojë institucionet dhe të vazhdojmë punën përballë problemeve e sfidave të vendit. Hajde në Kuvend, bëni institucionet dhe të vazhdojmë punën”, tha Bytyqi.
