Ministria e Arsimit dhe Shkencës ka bërë publike thirrjen për përfitimin e racionit të subvencionuar studentor gjatë vitit akademik 2026/2027, duke u bërë thirrje studentëve që plotësojnë kriteret të paraqesin aplikimin e tyre.
Të lidhura
None found
Skema u takon shtetasve të Republikës së Maqedonisë së Veriut, të regjistruar si studentë të rregullt në ciklin e parë, ciklin e dytë apo në programe të integruara studimi në universitete shtetërore ose private. Kusht është që të ardhurat e tyre mujore, nga çdo burim, të mos e tejkalojnë pagën minimale neto në vend për vitin aktual.
Aplikimi kryhet online përmes adresës https://e-uslugi.mon.gov.mk/. Gjatë procedurës, studentët duhet të plotësojnë formularin “Aplikim për fitimin e së drejtës për racion të subvencionuar studentor” dhe dokumentin “Deklaratë për saktësinë e të dhënave të paraqitura në aplikim”, t’i firmosin dhe t’i ngarkojnë në aplikacionin elektronik.
Për studentët që janë aktualisht të regjistruar, por edhe për ata që do të regjistrohen dhe do të marrin statusin e studentit në vitin akademik 2026/2027, aplikimet pranohen nga 26 deri më 31 gusht 2026.
Një mundësi tjetër aplikimi do të hapet çdo muaj, duke nisur nga tetori, në periudhën 1 deri më 5. Kjo vlen për studentët që nuk e kanë përfituar të drejtën përmes kësaj thirrjeje, si dhe për ata të cilëve u është ndërprerë për shkak se nuk kanë plotësuar një nga kriteret, në rast se më vonë i përmbushin sërish kushtet.
Sipas njoftimit të Ministrisë së Arsimit dhe Shkencës, studentët që miratohen si përfitues do t’i marrin mjetet gjatë muajit pasardhës të muajit në të cilin kanë dorëzuar aplikimin.
Mbështetja financiare për racionin studentor është 140 denarë dhe përdoret për blerjen e ushqimit të përgatitur.
Shërbimi mund të shfrytëzohet nga e hëna deri të shtunën. Në rast se studenti nuk e përdor racionin gjatë kësaj periudhe, fondet do të qëndrojnë të disponueshme në llogarinë e tij deri në përfundim të javës, pra deri të shtunën.
Përfitimi nuk mund të përdoret nga 1 korriku deri më 1 tetor, si dhe në ditët e festave shtetërore dhe ditët jopune.
Për pagesat e racionit të subvencionuar studentor, Ministria e Arsimit dhe Shkencës ka nënshkruar marrëveshje me Sparkasse Bank AD Skopje. Studentët që përfitojnë këtë të drejtë duhet të lidhin kontratë me bankën për hapjen e një llogarie të veçantë, e cila do të jetë e lidhur me një kartelë pagese të dedikuar për racionin e subvencionuar studentor, edhe nëse më parë kanë qenë klientë të Sparkasse Bank.
Informacionet për afatin dhe procedurën e marrjes së kartelave do të bëhen publike më vonë nga Ministria e Arsimit dhe Shkencës dhe Sparkasse Bank.
Detajet për kriteret e përfitimit dhe hapat e aplikimit gjenden në thirrjen publike të Ministrisë. Për ndihmë lidhur me aplikimin, studentët mund t’i drejtohen Sektorit për standardin e nxënësve dhe studentëve, si dhe të kontaktojnë në adresën elektronike [email protected].
