Drenica ka siguruar një pikë në përballjen me Malishevën, pasi barazoi 1-1 në minutën e parë të shtesës, në ndeshjen e vlefshme për xhiron e dytë të Superligës së Kosovës.
Të lidhura
None found
Malisheva e kishte avantazhin deri në fund të takimit, por vendasit nuk arritën ta ruanin epërsinë, ndërsa “kuqezinjtë” reaguan në momentet e fundit.
Golin e barazimit për Drenicën e shënoi Elvis Geci, i cili realizoi në minutën e parë të kohës shtesë.
Geci e dërgoi topin në rrjetë nga afërsia, pasi përfitoi nga topi i kthyer prej shtyllës pas goditjes së Altin Vojvodës. Ky gol solli festë te skuadra mysafire.
Malisheva kishte kaluar në epërsi në minutën e 41-të, kur Xhemal Ibishi shënoi dhe bëri që ekipi i tij ta mbyllte pjesën e parë në avantazh.
Megjithatë, ky rezultat nuk ishte i mjaftueshëm për t’i dhënë Malishevës tri pikët, pasi Drenica vazhdoi të luftonte deri në fund dhe arriti ta gjente golin e barazimit.
Pas këtij barazimi, Malisheva numëron katër pikë, ndërsa Drenica ka grumbulluar dy pikë pas dy xhirove. Drenicasit kishin barazuar edhe në ndeshjen hapëse të sezonit ndaj Dukagjinit.
