Filmi i Christopher Nolan, i frymëzuar nga “Odisea”, përveçse ka sjellë miliona spektatorë në sallat e kinemasë, ka nxitur ndjeshëm edhe kërkesën për poemën homerike dhe veprat që lidhen me mitologjinë greke.
Të lidhura
None found
Në Britani, gjatë katër javëve deri më 25 korrik, shitjet e botimeve të “Odisesë” shënuan një rritje prej 1.400 për qind kundrejt së njëjtës periudhë të një viti më parë. Mes varianteve më të preferuara renditet përkthimi i realizuar në vitin 2017 nga studiuesja britaniko-amerikane Emily Wilson.
Edhe Waterstones regjistroi mbi 1.000 për qind më shumë shitje në krahasim me vitin 2025. Vëmendja e lexuesve nuk është kufizuar vetëm te “Odisea”, por është zgjeruar edhe te “Iliada”, “Circe” e Madeline Miller dhe “Penelopiada” e Margaret Atwood. Ndërkohë, në Amazon, përshtatja e veprës nga aktori dhe shkrimtari Stephen Fry udhëheq renditjen britanike të librave historikë më të shitur. Rritje e interesit është vërejtur gjithashtu te librat audio.
Sipas Spotify, kërkimet për përkthimet e “Odisesë” janë shtuar me 310 për qind. Pedagogët në Britani shpresojnë se jehona e filmit do të bindë më shumë të rinj të zgjedhin studimet për letërsinë dhe qytetërimin klasik. Universiteti UCL, institucioni ku Nolan studioi Homerin gjatë periudhës universitare, parashikon shtim të numrit të studentëve në vitet e ardhshme.
Ngjarja e filmit përqendrohet te përpjekja e Odiseut për t’u kthyer në shtëpi pas Luftës së Trojës. Rolin e heroit e luan Matt Damon, Anne Hathaway interpreton Penelopën, ndërsa Tom Holland shfaqet si djali i tyre, Telemaku.
Për dy javë rresht, “Odisea” ka qëndruar në krye të kinemave amerikane, ndërsa të ardhurat globale kanë arritur në 640 milionë dollarë. Pavarësisht suksesit, filmi është përballur me kritika nga Emily Wilson dhe historiania Mary Beard. Wilson tha se skenarit i mungon thellësia psikologjike, emocionale dhe etike që karakterizon poemën. Beard, nga ana tjetër, vlerësoi se ironitë dhe dilemat e veprës janë lënë mënjanë për t’i hapur rrugë një mesazhi të rënduar hollivudian.
