Autoritetet në Mbretërinë e Bashkuar kanë vënë në pranga Eleni Argyriou, 46-vjeçe, e cila kërkohej në nivel ndërkombëtar për rolin e saj të dyshuar në zjarrvënien vdekjeprurëse në degën e bankës Marfin në kryeqytetin grek, gjatë trazirave të vitit 2010.
Arrestimi u krye mbi bazën e një urdhri të shpërndarë globalisht nëpërmjet “Njoftimit të Kuq” të Interpolit.
Të lidhura
None found
Gruaja ndodhet nën hetim së bashku me dy persona të tjerë, të cilët tashmë janë ndaluar për ngjarjen e rëndë ku humbën jetën tre punonjës të bankës, teksa Athina ishte përfshirë nga vala e protestave.
Pak para se të arrestohej, 46-vjeçarja, e përfaqësuar nga mbrojtja e saj ligjore, kishte komunikuar me shtypin helen duke shprehur gatishmërinë për t’u rikthyer me dëshirë në atdhe dhe për të bashkëpunuar me drejtësinë, me synimin për të dëshmuar pafajësinë e saj.
“Po rikthehem në Greqi me vullnetin tim të lirë dhe i vë veten nën autoritetin e hetuesisë për çdo hap të nevojshëm. Nuk kam asnjë përfshirje në krimin e tmerrshëm të Marfinit”, kishte pohuar ajo në deklaratën e mëparshme.
Pavarësisht këtij qëndrimi, pala greke i vuri në lëvizje mekanizmat e bashkëpunimit ndërkombëtar penal, veprim që solli si pasojë ndalimin e saj nga forcat britanike të rendit.
Tani, të gjitha sytë janë kthyer nga procesi i nisjes së ekstradimit drejt Greqisë, ku e dyshuara do të dalë para organeve të ndjekjes penale për t’u përballur me akuzat që i varen mbi shpatulla.
