Astrit Selmani e mbylli me shifra të spikatura sezonin në Ligën e Parë të Kinës dhe u rendit ndër futbollistët më të dalluar të kampionatit.
Me fanellën e Shaanxi Unionit, sulmuesi kosovar shënoi 15 gola dhe dha shtatë asistime në 28 ndeshje. Me 22 kontribute në gola, ai ishte lojtari më produktiv i kampionatit.
Të lidhura
None found
Megjithatë, paraqitjet e tij nuk mjaftuan që Shaanxi Union të siguronte ngjitjen në elitë. Ekipi e përfundoi sezonin në vendin e tretë me 51 pikë, gjashtë më pak se Nantong Zhiyun, që u rendit i dyti dhe siguroi promovimin e drejtpërdrejtë.
Kështu, skuadra nuk e arriti objektivin e promovimit, ndonëse Selmani ishte figura kryesore e saj dhe ndër lojtarët më të mirë të kampionatit.
Statistikat e këtij sezoni tregojnë vazhdimësinë e sulmuesit në futbollin kinez. Në vitin 2025, gjatë 13 paraqitjeve për Shaanxi Unionin, ai kishte shënuar pesë gola dhe kishte dhënë katër asistime.
Në dy sezonet e tij në kampionatin kinez, Selmani ka grumbulluar gjithsej 20 gola dhe 11 asistime, duke u bërë një prej futbollistëve kyç të skuadrës.
Para transferimit në Kinë në korrik të vitit 2025, ai luajti për disa klube evropiane, mes tyre Hammarby, Varbergs, Hapoel Be’er Sheva, Midtjylland, IFK Göteborg dhe Dinamo Bukuresht.
Selmani ka përfaqësuar edhe Kosovën, me pesë ndeshje dhe një gol. Rrjetën e vetme me fanellën dardane e gjeti në fitoren 5-0 kundër Burkina Fasos, në mars të vitit 2022.
Pavarësisht se Shaanxi Union nuk arriti promovimin, sulmuesi e përfundon sezonin me statistika mbresëlënëse. Ende nuk dihet nëse ai do të vijojë karrierën në Kinë apo do t’i krijohet një mundësi e re.
Selmani mbetet në vëmendjen e Kosovës, por konkurrenca nga futbollistë si Vedat Muriqi (Fenerbahce), Fisnik Asllani (Hoffenheim) dhe Albion Rrahmani (Venezia), të cilët aktivizohen në kampionate shumë më të forta, ka bërë që 29-vjeçari të mos marrë ftesë.
