Përmes rrjeteve sociale, kreu i Partisë Demokratike, Sali Berisha, iu drejtua qytetarëve ku vuri në shënjestër kryeministrin Edi Rama për mënyrën si u shfaq në samitin e Aleancës Euroatlantike, si edhe për financimin e koncertit të Kanye West në Tiranë.
Sipas Berishës, Shqipëria u paraqit në mënyrën më të papërshtatshme në NATO, ndërsa ai kritikoi ashpër si veshjen, ashtu edhe sjelljen e Ramës gjatë samitit.
Të lidhura
None found
Ai tha se mediat ndërkombëtare e kanë përshkruar kryeministrin si “shakaxhi, hokatar dhe servil”, duke theksuar se një sjellje e tillë dëmton imazhin e vendit.
Berisha e akuzoi gjithashtu kreun e qeverisë se ka shkelur, sipas tij, rregullat dhe protokollet ndërkombëtare, duke mos respektuar institucionin që përfaqëson.
Në të njëjtën kohë, ai foli për protestat kundër qeverisë, të cilat i cilësoi paqësore dhe të forta, duke u bërë thirrje qytetarëve që t’i bashkohen protestës kundër qeverisë Rama.
Një tjetër pikë e kritikës së tij ishte vendimi për të financuar me 4 milionë euro koncertin e Kanye West në Tiranë.
“I vetmi vend që u përfaqësua aty në mënyrën më qesharake në Aleancën e Euratlantikut ishte Shqipëria, pasi padrino i Shqipërisë me ekzibicionizmin e tij, mund të shkohet me atletet e basketbollistit. Skam asgjë për atletet, por ato janë për evente sportive. Kurse në atë samit, vetëm ai që nuk ka mend, e është torollak dhe i sëmurë, mund të bëjë një akt të tillë. Ai personalisht mori atë që meritonte, e damkosën si shakaxhi, hokatar dhe servil, mediat më të mëdha të botës. Shqipërisë nuk mund të them se i mbeti turpi nga një individ si ky, që thyen kushtetutën e vendit të tij, shkel rregullat dhe protokollet ndërkombëtare, për të demonstruar respektin, për ata që ti përfaqëson dhe ndaj atyre që ti takon. Nuk janë vullnetarizma, janë shekullore. Kur hyn ai që nuk meriton aty, pritet. Protesta paqësore, qëndron e pamposhtur dhe e jashtëzakonshme. Sot ftoj të gjithë qytetarët që të bashkohen në një protestë të fuqishme, tërësisht ndaj akteve të përsëritura të Ramës dhe qeverisë së tij. Por pagesa 4mln për Kanye West, është fyerje, injorim për shqiptarët.”, tha Berisha.
