Departamenti për të Mitur pranë Prokurorisë Themelore Publike në Shkup ka dorëzuar te gjyqtari kompetent për fëmijë një kërkesë për fillimin e procedurës përgatitore ndaj dy vajzave 14-vjeçare, për të cilat ka dyshim të bazuar se kanë kryer veprën që ligjërisht cilësohet si penale “Dhunë”, njoftojnë nga Prokuroria Publike.
Të lidhura
None found
Sipas PTHP-së, procedurë përgatitore është kërkuar edhe ndaj një 15-vjeçareje për ndihmë në kryerjen e kësaj vepre, si edhe për “Xhirim të paautorizuar” sipas nenit 152, paragrafi 1 të Kodit Penal. Po ashtu, një kërkesë e tillë është paraqitur edhe për një tjetër të mitur 14-vjeçar për xhirime të paautorizuara.
Në njoftim thuhet se më 30 qershor, vajzat e denoncuara, duke vepruar në grup, ushtruan dhunë të rëndë në një shesh lojërash pas një qendre tregtare në Shkup, duke vënë në rrezik sigurinë e një vajze 12-vjeçare. Në veprime mori pjesë edhe një fëmijë tjetër 13 vjeç, i cili për shkak të moshës nuk mund të mbahet penalisht përgjegjës.
Sipas përshkrimit të rastit, ato e detyruan vajzën të ulej në gjunjë dhe të kërkonte falje, e më pas e goditën me shuplaka dhe e tërhoqën për flokësh. Si pasojë e goditjeve, viktima pësoi lëndime trupore, ndërsa shoqja e saj, që ishte dëshmitare e ngjarjes dhe e pranishme mes publikut, u ndje e pasigurt, e kërcënuar dhe e frikësuar.
Po ashtu, njëri nga djemtë kontribuoi në aktet e dhunës përmes këshillave, udhëzimeve dhe nxitjes për mënyrën se si të kryhej vepra. Ndërkohë, dy djem realizuan pa leje një incizim video të dhunës, pa pëlqimin e viktimës dhe në shkelje të privatësisë së saj. Regjistrimin më pas ua dërguan autorëve.
Prokurori publik i ka propozuar gjykatës që gjatë zhvillimit të procedurës të vendoset edhe një masë paraprake, që ndalon fëmijët në konflikt me ligjin t’i afrohen viktimës ose të krijojnë e mbajnë kontakte dhe marrëdhënie me të, thuhet në njoftimin e PTHP-së./Telegrafi/
