Ministria e Punëve të Brendshme ka regjistruar nëntë raste të dhunës në familje në zona të ndryshme të vendit gjatë 24 orëve të fundit. Në pesë prej tyre, të dyshuarit janë arrestuar, ndërsa me tre persona është kryer bisedë zyrtare.
Të lidhura
None found
Sipas MPB-së, për secilin nga rastet janë informuar prokurorët publikë kompetentë dhe, pasi të përfundojë dokumentimi i plotë, do të dorëzohen kallëzimet përkatëse.
Në Kumanovë, policia ka ndaluar një 32-vjeçar nën dyshimin se ka ushtruar dhunë fizike ndaj nënës së tij në banesën familjare.
Në Tetovë është arrestuar një 62-vjeçar, pasi dy djemtë e tij e kanë kallëzuar se, duke qenë nën ndikimin e alkoolit, i ka sulmuar fizikisht dhe i ka kanosur me një mjet të mprehtë.
Në komunën e Çashkës, një 28-vjeçar është privuar nga liria me dyshimin se ka sulmuar partneren e tij jashtëmartesore, duke përdorur edhe një send të fortë. Gjatë kontrollit, është konstatuar se ai ishte nën ndikimin e alkoolit.
Në Shtip, policia ka arrestuar një 39-vjeçar, për të cilin është raportuar se ka kërcënuar ish-bashkëshorten e tij dhe ka shkelur masën gjyqësore për mbrojtje nga dhuna në familje.
Në Veles, një 24-vjeçar ka përfunduar në pranga për shkak se dyshohet se ka kërcënuar ish-partneren e tij dhe ka sulmuar fizikisht një mik të saj në një lokal.
Po në Veles, zyrtarët policorë kanë zhvilluar biseda zyrtare me tre persona, pasi një burrë ka denoncuar se ishte sulmuar fizikisht nga vëllai, nusja dhe babai i tij.
Në Shkup, një grua 41-vjeçare ka paraqitur rast se është sulmuar fizikisht nga bashkëshorti në shtëpinë familjare. Ndërkohë, një vajzë 21-vjeçare ka raportuar se është kërcënuar nga partneri i saj.
Në Pehçevë, një grua 46-vjeçare ka denoncuar se bashkëshorti e ka sulmuar fizikisht para një objekti hotelierik.
