Guami dhe Ishujt Mariana Veriore janë futur në gjendje gatishmërie pas afrimit të Supertajfunit Bavi, një sistem i fuqishëm tropikal që është forcuar deri në nivelin maksimal dhe që pritet të godasë territorin amerikan në Oqeanin Paqësor në fillim të javës së ardhshme.
Sipas Qendrës së Përbashkët të Paralajmërimit për Tajfunet (JTWC), Bavi tashmë ka marrë statusin e “supertajfunit”, i barasvlershëm me një uragan të Kategorisë 5. Në mesnatë, stuhia po zhvendosej drejt perëndimit me erëra të qëndrueshme deri në 259 kilometra në orë, ndërsa shpërthimet arrinin në 314 kilometra në orë.
Të lidhura
None found
Parashikimet e meteorologëve tregojnë se stuhia mund të humbasë disi forcë përpara se të arrijë në Guam dhe Ishujt Mariana Veriore të hënën në mëngjes, megjithatë pritet të sjellë ende kushte të rrezikshme të stuhisë tropikale.
Shërbimi Kombëtar Meteorologjik i SHBA-së ka vlerësuar se drejtimi i parashikuar i stuhisë krijon “një perspektivë alarmante për Ishujt Mariana” dhe u ka kërkuar banorëve të mbyllin sa më parë të gjitha përgatitjet.
Në Saipan, automjetet janë rreshtuar gjatë në pikat e furnizimit me karburant, ndërsa banorët u janë drejtuar dyqaneve për të siguruar kompensatë, materiale mbrojtëse për shtëpitë, si edhe rezerva ushqimore dhe ujë të pijshëm.
Rajoni mund të përballet me goditjen e dytë nga një supertajfun në vetëm dy muaj, pasi në prill Super Tajfuni Shinlaku solli ndërprerje të mëdha të energjisë elektrike, rrëzoi pemë, përmbysi automjete dhe shkaktoi dëme në qindra ndërtesa.
Përballë kërcënimit nga stuhia, organizimet për festimet e 250-vjetorit të shpalljes së pavarësisë së Shteteve të Bashkuara kanë kaluar në plan të dytë.
Ishujt Mariana Veriore kanë rreth 40 mijë banorë, ndërsa Guam ka afërsisht 170 mijë banorë. Një banor i zonës u shpreh se “dy supertajfunë brenda dy muajsh është diçka historike” dhe se arkipelagu nuk ka përjetuar më parë një situatë të tillë.
Në të njëjtën kohë, Organizata Botërore Meteorologjike bëri të ditur se fenomeni klimatik El Niño ka nisur tashmë në Paqësorin tropikal. Ky fenomen, i cili zakonisht shfaqet çdo dy deri në shtatë vjet, rrit temperaturën e sipërfaqes së oqeanit dhe ndikon në qarkullimin e erërave dhe reshjeve, duke ndryshuar modelet klimatike në mbarë botën.
