Pamje të tjera janë bërë publike nga rrëzimi i një helikopteri zjarrfikës në liqenin artificial të Aoos në Metsovo, në Greqi, teksa mjeti po merrte pjesë në një operacion për fikjen e zjarreve në zonën e Grevenës.
Në videon e re duket një prej pilotëve në ujë, shumë pranë trupit të helikopterit të mbytur, i cili shihet qartë poshtë sipërfaqes së liqenit. Pak çaste më vonë, ai del në sipërfaqe dhe qëndron me ujë deri në gjoks, ndërsa vështron mjetin ajror të tipit Bell të zhytur.
Të lidhura
None found
Këto pamje publikohen pas një videoje tjetër që kishte qarkulluar më herët në rrjet, ku kapet çasti kur helikopteri humb kontrollin gjatë furnizimit me ujë nga liqeni për operacionet e shuarjes së flakëve. Sapo mjeti tenton të ngrihet, pjesa e bishtit prek ujin, gjë që sjell humbjen e qëndrueshmërisë dhe rrëzimin në liqen. Më tej, sipas pamjeve, helikopteri përfshihet nga flakët dhe më pas fundoset.
Dy pilotët mundën të dilnin nga helikopteri dhe të notonin deri në bregun e liqenit, ku u ndihmuan nga një varkë. Më pas ata u dërguan me ambulancë në spitalin e Janinës për kontrolle mjekësore.
Një dëshmitar okular, i cili filmoi incidentin, përshkroi momentet e para të ngjarjes duke deklaruar se helikopteri dukej se po haste vështirësi për t’u ngritur gjatë marrjes së ujit. Sipas tij, mjeti “nuk po arrinte të fitonte lartësi” përpara përplasjes me sipërfaqen e liqenit.
“Diçka nuk shkon, nuk mund të fitojë lartësi,” është shprehur dëshmitari, teksa ka treguar edhe çastin kur helikopteri humbi kontrollin dhe u përmbys në ujë.
Ai tha gjithashtu se pas aksidentit, banorët e zonës dhe dëshmitarët u përpoqën të jepnin ndihmë dhe lajmëruan menjëherë autoritetet, të cilat mbërritën në vendngjarje brenda pak minutash, së bashku me zjarrfikëset dhe policinë.
Ndërkohë, autoritetet greke kanë vijuar hetimet për të zbardhur shkaqet e sakta të aksidentit. Ngjarja ka rikthyer edhe një herë vëmendjen te rreziqet që shoqërojnë operacionet ajrore për shuarjen e zjarreve në zona të vështira.
