Protestuesit shqiptarë në Vjenë, të organizuar nën emrin Revolucioni Flamingo Austria, i kanë dërguar një letër të hapur institucioneve më të larta të Austrisë dhe të Bashkimit Europian, në mbështetje të protestave studentore që po përfshijnë Tiranën dhe qytete të tjera të Shqipërisë.
Shqiptarët e Austrisë, të cilët kanë protestuar mbi 20 herë në Vjenë që nga nisja e lëvizjes, deklarojnë se do të vazhdojnë mbështetjen e tyre për studentët dhe qytetarët që protestojnë në Shqipëri. Në letër ata u bëjnë thirrje partnerëve ndërkombëtarë të mos qëndrojnë neutralë dhe të dënojnë dhunën ndaj të rinjve që protestojnë.
Të lidhura
None found
Më poshtë po publikojmë të plotë deklaratën, të përkthyer në shqip:
Shqiptarët e Austrisë letër të hapur institucioneve austriake dhe të BE-së: “Koha e heshtjes ka mbaruar, Edi Rama duhet të japë dorëheqjen!”
Letër e hapur drejtuar miqve dhe mbështetësve të Shqipërisë
Të nderuar partnerë ndërkombëtarë, intelektualë, vendimmarrës dhe palë të interesuara,
Shqipëria po përballet me një moment përcaktues. Ajo që nisi si protestë kundër projektit të paqartë të zhvillimit Sazan–Nartë, është shndërruar në një lëvizje më të gjerë qytetare, si në Shqipëri ashtu edhe jashtë saj, që kërkon llogaridhënie, demokraci dhe dorëheqjen e Kryeministrit Edi Rama.
Kjo lëvizje udhëhiqet kryesisht nga familje të reja, të rinj dhe studentë, të cilët nuk janë më të gatshëm të pranojnë korrupsionin, arrogancën dhe përqendrimin e pushtetit. Qytetarët e Shqipërisë kanë duruar për më shumë se një dekadë skandale që përfshijnë disa nga zyrtarët më të lartë të vendit, përfshirë ish-zëvendëskryeministren dhe ministren e Infrastrukturës, Belinda Balluku, si dhe ish-drejtorin e SHISH-it (Shërbimi Informativ Shtetëror, përgjegjës për inteligjencën dhe sigurinë kombëtare), ndërkohë që besimi i publikut te institucionet shtetërore vazhdon të gërryhet.
Më alarmuese është se dhuna dhe frikësimi ndaj studentëve dhe të rinjve që protestojnë po rriten dita-ditës. Kjo përpjekje e qartë për të heshtur me forcë zërat e të rinjve duhet dënuar.
Komuniteti ndërkombëtar nuk duhet ta humbasë nga sytë atë që ka vërtet rëndësi. Zhvendosja e vëmendjes nga të drejtat demokratike te incidentet gjatë protestave rrezikon të interpretohet si pranim i rënies demokratike, i korrupsionit dhe i dhunës në rritje. Përkulja para një regjimi në kurriz të parimeve demokratike i minon pikërisht ato vlera. Qytetarët e Shqipërisë meritojnë të njëjtat standarde demokratike që përfaqëson Europa.
Çdo ditë që kalon pa një qëndrim të qartë dhe parimor u dërgon mesazhin e gabuar atyre qytetarëve që dalin nga rehatia e tyre sepse ende besojnë te demokracia dhe te vlerat që përfaqëson Europa. Ky nuk është moment për neutralitet. Është moment për guxim, parime dhe veprim.
Populli shqiptar kërkon demokraci, llogaridhënie dhe dinjitet. Zëri i tij meriton të dëgjohet. Europa duhet ta bëjë qëndrimin e saj plotësisht të qartë dhe të tregojë, përmes veprimeve, në cilën anë qëndron: në anën e vlerave demokratike dhe të qytetarëve që i mbrojnë ato, apo në anën e një qeverie represive që ka humbur përfundimisht besimin e qytetarëve të saj. Shumica dërrmuese e shqiptarëve janë në favor të BE-së dhe duan që qeveria shqiptare të ruajë angazhimin e saj ndaj vlerave europiane.
Koha e heshtjes ka mbaruar. Koha e llogaridhënies është tani. Ata që e mbështesin Shqipërinë kanë përgjegjësinë të flasin dhe të dërgojnë një mesazh të qartë: Edi Rama duhet të japë dorëheqjen!
Në emër të Revolucionit Flamingo AustriaShqiptarët e Austrisë letër të hapur institucioneve austriake dhe të BE-së: “Koha e heshtjes ka mbaruar, Edi Rama duhet të japë dorëheqjen!”
