Një komandant i Gardës Revolucionare të Iranit tha se Deti Mesdhe mund të bëhet i pakalueshëm nëse Shtetet e Bashkuara dhe aleatët e saj vazhdojnë të kryejnë, siç u shpreh ai, “krime” në Gazë, njoftoi media iraniane të shtunën, por pa dhënë shpjegime se si mund të ndodhë një gjë e tillë.
Irani e mbështet luftën e Hamasit kundër Izraelit dhe i akuzon Shtetet e Bashkuara se po përkrahin ato që i cilëson si krime izraelite në Gazë.
“Së shpejti, ata do të përballen me bllokimin e rrugëve detare në Detin Mesdhe, Gjibraltar dhe rrugë të tjera detare”, njoftoi agjencia iraniane e lajmeve Tasnim duke cituar komandantin e Gardës Revolucionare të Iranit Mohammad Reza Naqdi.
Grupi Houthi në Jemen, i lidhur me Iranin, ka sulmuar gjatë muajit të kaluar anijet tregtare që lundronin nëpër Detin e Kuq si hakmarrje për sulmin e Izraelit në Gazë, duke detyruar disa anije që të ndryshojë itenerarin e tyre.
Shtëpia e Bardhë tha të premten se Irani ishte “thellësisht i përfshirë” në planifikimin e operacioneve kundër anijeve tregtare në Detin e Kuq.
Irani nuk ka qasje të drejtpërdrejtë në Mesdhe dhe nuk është e qartë se si Garda Revolucionare e Iranit mund të përpiqet të bllokojë transportin detar atje, megjithëse komandanti Naqdi foli për “lindjen e fuqive të reja të rezistencës dhe mbylljen e rrugëve të tjera detare”.
Grupet e vetme që mbështeten nga Irani në Mesdhe janë Hezbollahu i Libanit dhe milicia aleate në Siri.
