Bastisja e paparalajmëruar në pronën e Donald Trump në Florida ka habitur mbështetësit, armiqtë dhe vëzhguesit e tij në mbarë botën.
Ndërsa Trump e përshkroi atë si një “kohë të errët për kombin tonë”, zyrtarët e Shtëpisë së Bardhë pranuan se nuk dinin asgjë për planet e FBI-së për të kontrolluar shtëpinë e tij në Mar-a-Lago.
Bastisja vjen në mes të tre hetimeve të veçanta në vazhdim ndaj ish-presidentit; një në Atlanta për komplot për të kryer mashtrime elektorale gjatë zgjedhjeve të vitit 2020, një tjetër në Nju Jork për çështjet financiare të kompanisë së tij të pasurive të paluajtshme dhe një i tretë për kryengritje e Capitol Hill në SHBA.
Çfarë kërkonte FBI në Florida?
Pasi presidenca e Donald Trump përfundoi në janar të vitit të kaluar, zyrtarët zbuluan se ai kishte marrë 15 kuti nga Shtëpia e Bardhë në shtëpinë e tij në Mar-a-Lago, Florida.
Ky hetim u nis nga Administrata Kombëtare e Arkivave dhe Regjistrimeve (NARA), organi i pavarur i qeverisë amerikane i ngarkuar me ruajtjen e të dhënave qeveritare dhe historike.
Pasi kërkoi që ai t’i kthente kutitë, NARA zbuloi në janar të këtij viti ato përmbanin dokumente qeveritare, duke përfshirë ato “të shënuara si informacione të klasifikuara të sigurisë kombëtare”, si dhe dhurata, letra dhe kujtime.
NARA më pas ia referoi çështjen Departamentit të Drejtësisë së SHBA-së për të hetuar nëse trajtimi i paautorizuar i dokumenteve nga Trump përbën shkelje të ligjit federal.
Disa nga dokumentet në kuti i nënshtrohen Ligjit për të dhënat presidenciale.
I miratuar nga Kongresi pas skandalit të Watergate të vitit 1972, ai dikton se dokumentet presidenciale nuk janë pronë e presidentit të atëhershëm dhe duhet t’i dorëzohen NARA-s kur të largohen nga detyra për t’u bërë publike 12 vjet më vonë.
Trump mund të kishte shkelur gjithashtu legjislacionin për trajtimin e duhur të dokumenteve qeveritare ndërsa ishte ende në detyrë ose të akuzohej për pengim të drejtësisë nëse zbulohej se kishte mbuluar gjurmët e tij.
Në prill u raportua se një hetim i jurisë së madhe federale kishte filluar dhe Departamenti i Drejtësisë kishte bërë disa kërkesa, duke përfshirë një thirrje në NARA për kutitë dhe intervistat me njerëz të ndryshëm në administratën Trump.
Rasti është në hetim e sipër dhe ndërsa FBI-ja nuk ka dhënë një deklaratë në lidhje me bastisjen e së hënës, njerëz të afërt kanë thënë se ky ishte fokusi i tij.
Nuk është e qartë se çfarë kërkonin zyrtarët e zbatimit të ligjit, por ka të ngjarë të ketë qenë ndonjë provë shtesë që do të ndihmonte në çështjen e prokurorëve.
Ata po përpiqen të provojnë se Trump ose ndihmësit e tij kanë shkelur qëllimisht ligjin.
Kjo do të nënkuptonte prodhimin e provave që tregojnë se kampit të Trumpit iu tha se nuk lejohej marrja e dokumenteve.
Hetimi i tyre do të shikojë se kush i vendosi sendet në kuti, çdo korrespondencë rreth tyre dhe si u transferuan nga DC në Florida.
Çfarë tha Trump?
Në një deklaratë të gjatë të publikuar në internet, ish-presidenti tha se shtëpia e tij ishte “nën rrethim, bastisje dhe pushtuar nga një grup i madh agjentësh të FBI-së”.
Ai nuk ishte aty në atë kohë, por u njoftua nga djali i tij, Eric Trump, i cili i tha pwr Fox News se urdhri i kontrollit kishte të bënte me një kuti dokumentesh të marra nga Shtëpia e Bardhë dhe se babai i tij kishte bashkëpunuar me NARA-n për këtë çështje.
Këtë gjë e bëri jehonë edhe vetë Trump, i cili tha se kishte “punuar dhe bashkëpunuar me agjencitë përkatëse qeveritare”.
Si rezultat, ai e përshkroi kërkimin si “jo të nevojshëm apo të përshtatshëm, sjellje të pahijshme prokuroriale, armatizimin e sistemit të drejtësisë dhe një sulm nga demokratët radikalë që dëshpërimisht nuk duan që unë të kandidoj për president në 2024”.
Ai e krahasoi rastin e tij me atë të rivales së tij politike për një kohë të gjatë, Hillary Clinton, për të cilën ai pohoi: “U lejua të fshinte dhe lante me acid 33,000 e-maile PAS ato u thirrën nga Kongresi. Ajo madje mori mobilje antike dhe sende të tjera nga Shtëpia e Bardhë.”
Një hetim federal u nis ndaj Clinton në vitin 2016 pasi u zbulua se ajo kishte dërguar informacione të klasifikuara në llogarinë e saj personale të e-mailit. Ajo përfundoi pa akuzë. Gjithashtu dhe ndihmësit e saj dolën të paprekur nga hetimi.
Dokumentet e grisura bllokuan tualetet e Shtëpisë së Bardhë
Gjatë fushatës së tij zgjedhore presidenciale dhe kohës në detyrë, Trump ka sulmuar vazhdimisht zonjën Clinton, të cilën ai e quajti “Hillary e shtrembër”, lidhur me hetimin në aktivitetin e saj me email.
Sipas burimeve të afërta me të gjatë kohës së tij në Shtëpinë e Bardhë, ai shpesh gris dokumentet zyrtare, duke i detyruar ndihmësit t’i bashkojnë ato përsëri në mënyrë që të mos shkelin ligjet që ndalojnë njerëzit që të shkatërrojnë rekordet presidenciale.
Një libër i ri nga një gazetare e New York Times detajon gjithashtu se si stafi i Shtëpisë së Bardhë gjente copa dokumentesh të grisura në tualet.
Më shumë nga sjellja e tij gjatë kohës që ishte në detyrë është zbuluar nga Komiteti i Dhomës së Përfaqësuesve që hetonte kryengritjen e 6 janarit.
Stafi ka treguar se si ai braktisi rregullisht centralin e Shtëpisë së Bardhë dhe në vend të kësaj filloi biznesin zyrtar në celularin e tij personal.
Të tilla boshllëqe në regjistrat e thirrjeve kanë shkaktuar probleme për komitetin, i cili ende po shqyrton nëse Trump kreu krime në ditën kur Shtëpia e Bardhë u sulmua nga protestuesit.
Ndryshimi i tonit nga Prokurori i Përgjithshëm
FBI nuk ka komentuar mbi bastisjen, me zyrtarë të lartë në vend që e përshkruan atë si një “ekzekutim të rregullt të një urdhri kontrolli”.
Zyrtarët e Shtëpisë së Bardhë thonë se ata nuk ishin në dijeni të bastisjes dhe e panë nga mediat.
Zakonisht një deklaratë u jepet agjentëve të FBI-së për çdo çështje të caktuar, e cila më pas shqyrtohet nga një gjyqtar.
Por një urdhër i tillë i nivelit të lartë, i pronës private të një ish-presidenti, ka të ngjarë të nënshkruhet nga prokurori i përgjithshëm, Merrick B Garland.
Garland, i emëruar nga Biden, njihet për kujdesin e tij, kështu që zhvillimet e së hënës sugjerojnë një ndryshim të dukshëm të tonit në trajtimin e çështjes nga institucioni.
Amerika nuk ka parë diçka të tillë që nga skandali Watergate që rrëzoi Presidentin Nixon gjysmë shekulli më parë./Përshtati në shqip, abeu.com
