Është bërë publike axhenda që do të ketë nesër Kuvendi Kombëtar i thirrur nga Kryesia e Partisë Demokratike, dhe Lulzim Basha.
Kuvendi që do të mbahet në ambientet e Pallatit të Kongreseve ka 3 shtylla kryesore të tij, dhe pika e parë lidhet me një vendimmarrje mbi situatën politike.
Burimet bëjnë me dije se nesër Kuvendi mund të vendosë edhe përjashtimin e Sali Berishës apo mbështetësve të tij nga partia.
Rikujtojmë se po nesër, Sali Berisha ka thirrur në referendum të gjithë anëtarët e PD-së që të votojnë pro apo kundër shkarkimit të Lulzim Bashës nga drejtimi i partisë, në vijim të vendimeve të marra në Kuvendin e datës 11 Dhjetor.
Axhenda e Kuvendit të thirrur nga Basha:
1- Vendimmarrje mbi situatën politike me si edhe marrjen e masave për të mbrojtur interesin e PD, duke mos lejuar që problemet apo interesat personale të secilit anëtar të dëmtojnë interesat elektorale dhe politike të PD dhe agjendën e saj politike në përballjen me regjimin e Edi Ramës.
2-Miratimin e Aksionit Politik për të ardhmen e Partisë Demokratike dhe shpalljen e Platformës Qytetare për demokraci, për rikthimin e legjitimitetit dhe demokracisë në vend si edhe ndërtimin e mekanizmit të bashkëpunimit me të gjitha forcat e shoqërisë në përballjen me regjimin e Edi Ramës , i cili në aleancë me krimin e organizuar ka shkatërruar çdo mjet të funksionit demokratike të shtetit shqiptar dhe po nxit braktisjen masive të vendit , kryesisht nga të rinjtë.
3-Miratimin e programit organizativ të Partisë Demokratike për të përgatitur strukturën e partisë për zgjedhjet e ardhshme , sipas Objektit “ partia Demokratike , partia e demokratëve dhe çdo shqiptari të ndershëm-Forca e vetme politike që do të sjellë ndryshimin në Shqipëri”. /albeu.com/
