Gjatë Samitit të APEK-ut që po mbahet në Kinë, Kryeministri australian Anthony Albanese iu drejtua pa ndërmjetës Vladimir Putinit, duke i kërkuar t’i japë fund konfliktit në Ukrainë.
Kjo thirrje erdhi në një moment kur Donald Trump, pas takimit me Xi Jinping, deklaroi se synon të trajtojë përfundimin e luftës në Ukrainë si në bisedat dypalëshe, ashtu edhe në një takim të ardhshëm trepalësh me Putinin. Megjithatë, qasja e liderit australian ishte dukshëm më e ashpër dhe e drejtpërdrejtë.
Të lidhura
None found
Sipas raportimit të The Guardian, ndërhyrja e Albanese u konsiderua tejet e prerë për një politikan që njihet për stilin e tij të matur dhe të llogaritur, edhe pse Australia ka qëndruar në krah të Ukrainës që nga fillimi i pushtimit rus në vitin 2022.
Duke e parë drejt e në sy Putinin, i cili sipas përshkrimeve mbante kokën ulur gjatë fjalës së tij, Albanese iu drejtua më shumë se 20 liderëve të pranishëm: “Dy prej shkaqeve kryesore të ndërprerjeve në tregti janë konfliktet në Ukrainë dhe në Lindjen e Mesme, dhe ne duhet të bëjmë çdo përpjekje për t’u dhënë fund atyre.”
Ai theksoi gjithashtu se “konflikti në Lindjen e Mesme po ndikon në inflacionin global dhe po rëndon koston e jetesës në ekonomitë tona.”
Më pas, duke iu kthyer personalisht presidentit rus, ai deklaroi: “Dhe këtë ia them shumë qartë Presidentit Putin, ndalojeni luftën tuaj. Ndalojeni tani.”






