Para selisë së Kryeministrisë ka filluar grumbullimi i protestuesve, në pritje të vazhdimit të protestës kundër qeverisë dhe kryeministrit Edi Rama. Thirrjet për largimin e tij nga posti shoqërohen me refuzimin e propozimit për dialog.
Prej disa javësh, kryeqyteti është përfshirë nga protesta studentore, gjatë së cilës janë zhvilluar marshime në rrugët e Tiranës dhe ndalesa pranë fakulteteve të ndryshme. Kërkesave të të rinjve u kanë dhënë mbështetje edhe pedagogë e qytetarë, duke iu bashkuar atyre.
Të lidhura
None found
Për studentët, dorëheqja e kreut të qeverisë mbetet një kusht që nuk mund të negociohet. Ftesat që Rama ka bërë disa herë për bisedime në tryezë janë hedhur poshtë deri më tani, ndërkohë që në universitete vazhdon bojkoti i mësimit.
Kryeministri, nga ana e tij, ka ripërsëritur apelin për t’u angazhuar në dialog dhe ka bërë të ditur se do të paraqesë një platformë online për të komunikuar me protestuesit. Kjo nismë, megjithatë, nuk e ka ndryshuar deri tani qëndrimin e studentëve, të cilët ngulin këmbë në kërkesën që ai të largohet nga detyra.
