Përurimi i projektit “Reflecting Pool” në Uashington u shoqërua me sulme të Donald Trump ndaj demokratëve. Presidenti amerikan mbajti me këtë rast fjalimin e tij të fundit përpara zgjedhjeve të ndërmjetme të së martës.
Projekti lidhet me liqenin e madh artificial ku pasqyrohen monumentet në nder të George Washington-it dhe Abraham Lincoln-it.
Të lidhura
None found
Pas pjesës së fjalimit kushtuar liqenit, Trump iu drejtua kundërshtarëve politikë, duke i cilësuar kandidatët demokratë si jashtëzakonisht të rrezikshëm. Ai pretendoi se ata përkrahin xhihadistët, Vëllazërinë Myslimane dhe grupe të tjera që, sipas tij, as mund të imagjinohen.
Në kritikat ndaj politikave të tyre, të cilat i quajti të tmerrshme, presidenti u ndal veçanërisht te imigracioni dhe të drejtat e personave transgjinorë.
Trump u zotua se vendi, kultura dhe trashëgimia amerikane do të mbrohen për brezat e ardhshëm. Ai shtoi se për ta bërë vendin të madh është luftuar për 250 vjet dhe se nuk do të lejohet që atë ta shkatërrojnë disa demokratë që ai i cilësoi si të dështuar.
Duke renditur më pas ato që i paraqiti si arritje të tij, Trump deklaroi se tashmë e kanë Grenlandën dhe falënderoi Danimarkën dhe Evropën për këtë. Ai këmbënguli gjithashtu se kishte përmbushur çdo premtim të dhënë.
